Halda upp á hertöku Gíbraltar

Bretar halda uppá það í dag að 300 ár eru liðin frá því að þeir hertóku Gíbraltarklettinn. Spánverjum er ekki skemmt, en Bretar segja að þetta komi þeim ekki við. Hátíðin er haldin til þess að minnast þess að breski flotinn hertók Gíbraltar árið 1704. Árið 1713, afsöluðu Spánverjar sér klettinum í hendur Breta, í Útrecht sáttmálanum, en hafa verið að reyna að endurheimta hann, æ síðan. Það er kannski ekki svo skrýtið því kletturinn er syðsti oddi Spánar og þeim gremst að hafa þar breska nýlendu, þótt örsmá sé. Gíbraltar nýlendan er ekki nema sex og hálfur ferkílómetri að stærð. Ástæðan fyrir því að Bretar hafa haldið svona fast í klettinn er hernaðarlega mikilvæg lega Gíbraltar, því siglingaleiðin inn á Miðjarðarhaf liggur um hið örmjóa Gíbraltarsund. Til þess að bæta sér upp hið örsmáa landflæmi hafa Bretar, í gegnum aldirnar grafið 54 kílómetra löng göng þvers og kruss um klettinn, á mörgum hæðum. Þar eru meðal annars neðanjarðar sjúkrahús, eldhús, og raforkustöðvar sem geta þjónað og hýst þúsundir manna. Breski herinn notar þessi göng enn þann dag í dag, enda hefur hernaðarlegt mikilvægi Gíbraltar síst minnkað.