Geimganga Padalka og Fincke

Bandarískur og rússneskur geimfari, fóru í dag í geimgöngu frá Alþjóðlegu geimstöðinni. Þeir bjuggu sig meðal annars undir að taka á móti nýrri tegund af birgðaflaugum, sem verið er að hanna í Evrópu. Þeir Gennady Padalka og Mike Fincke voru báðir í rússneskum geimbúningum, þar sem galli kom fram í þeim bandarísku, sem ekki hefur tekist að lagfæra þrátt fyrir margra vikna tilraunir. Það er Evrópska geimferðastofnunin sem er að hanna nýtt ómannað birgðaskip til þess að flytja vistir til Alþjóðlegu geimstöðvarinnar. Bandarísku geimferjurnar hafa verið úr leik síðan Kólumbía fórst, á síðasta ári, og það hefur því verið notast við rússnesk Vostok geimför, sem eru komin til ára sinna. Smíði nýja evrópska birgðaskipsins hefur seinkað talsvert, og það verður ekki tilbúið fyrr en einhverntíma á næsta ári. Það er þó þegar búið að hanna ýmsan tengibúnað fyrir birgðaskipið, og það var hann sem geimfararnir voru að koma fyrir á alþjóða geimstöðinni, í dag, auk þess sem þeir unnu að viðhaldsverkefnum.