Þremur rænt og sleppt sama dag

Palestínskir vígamenn rændu þremur útlendingum í borginni Nablus á Vesturbakkanum í morgun. Þeir létu þá lausa skömmu síðar eftir þrýsting frá öðrum vígahópum í Palestínu. Útlendingarnir unnu sem sjálfboðaliðar við kristna kirkju í borginni Nablus á Vesturbakkanum og komu frá Bandaríkjunum, Írlandi og Bretlandi. Skömmu seinna leystu mannræningjar gíslana úr haldi eftir að önnur samtök vígamanna á heimastjórnarsvæðunum mótmæltu harðlega gíslatökunni. Mannræningjarnir tilheyra hópi sem hefur tengsl við Fatah-hreyfingu Arafats. Lengi vel hefur verið óttast að uppreisnarmenn í Palestínu grípi til svipaðra aðgerða og vígamenn í Írak, það er að ræna erlendu fólki, og setja fram kröfur. Annar hópur úr sömu hreyfingu og rændi kirkjufólkinu réðst á opinbera Palestínska byggingu í borginni Jenín á Vesturbakkanum í gærkvöldi. 12 vígamenn, sem eru eftirlýstir í Ísrael, réðust inn í bygginguna eftir að flestir voru farnir heim. Þeir skutu úr vopnum sínum og kveiktu svo í. Mennirnir kröfðust þess að fá fjárhagslegan stuðning frá stjórn Yassers Arafats, forseta Palestínu, í baráttu sinni gegn Ísrasel. Að sögn mannanna vantar þá opinberan stuðning palestínsku heimastjórnarinnar en þeim gengið erfiðlega að berjast og halda úti neðanjarðarhreyfingu síðustu mánuði. Mikill órói er nú á heimastjórnarsvæðnunum og óttast menn að átök á meðal Palestínumanna sjálfra kunni að fara úr böndunum.