Látinn í 15 ár og leikur í bíómynd

Breski stórleikarinn sir Laurence Olivier, sem lést fyrir fimmtán árum, verður í hópi frægra aðalleikara í nýrri kvikmynd, sem byggist á vísindaskáldsögu. Hann er kynntur til sögunnar ásamt sprell lifandi nútímaleikurum á borð við Gwyneth Paltrow og Angelínu Jolie í amrískri stórmynd, sem á að heita: Sky Kaptain and the World of Tomorrow. Sir Olivier á að leika þar vonda kallinn, eða aðal skúrkinn, sem heitir Doktor Totenkopf. Framleiðandi myndarinnar er bandarísak fyrirtækið CMG Worldwide og hefur fyrirtækið þegar samið við erfingja Oliviers um afnot af myndskeiðum úr gömlum myndum, sem breytt verður með tölvutækni þannig að engu verður líkara en hann gangi í endurnýjun lífdaga. Fyrirtækið hefur sérhæft sig í þessari tækni og þannig högnuðust erfingjar Marylin Monroe um átta milljónir dollara í fyrra vegna leik hennar í nýrri mynd. Bretar velta hinsvegar vöngum yfir siðferðinu í þessu öllu saman, en ef samþykki erfingja er fyrir hendi, þá er tæknin fyrir hendi, og hver veit að þegar fram líða stundir birtist Þorsteinn Ö. Stephensen eða Brynjólfur Jóhannesson allt í einu í glæ nýjum víkingatrylli eftir Hrafn Gunnnlaugsson.