Mannskæðustu átök í mánuð

Átök dagsins í dag í Írak voru þau mannskæðustu frá því að Írakar tóku aftur við völdum fyrir réttum mánuði. Að minnsta kosti 111 manns létust í tveimur bílsprengingum og bardögum milli skæruliða og hermanna. Dagurinn í dag var blóðugur í Írak. Hátt í sjötíu manns létust í öflugri bílsprengingu í Baquba í morgun og rúmlega 40 létust í bardögum milli skæruliða og hermanna í suðurhluta Íraks. Þá slösuðust 11 bandarískir hermenn í árás á herstöð Bandaríkjamanna utan við Ramadi, einn lést og nokkrir slösuðust í sprengingu í Bagdad og lögregluþjónn var mirtur í Kirkúk. Sprengingin í Baquba var gríðarlega öflug og splundruðust rúður á nærliggjandi kaffihúsum, framhliðar húsa rifnuðu og eldur kviknaði í fjölmörgum bifreiðum. Sprengingin átti sér stað utan við ráðningarstöð lögreglunnar í miðborg Baquba. Nokkur fjöldi manna hafði safast saman utan við ráðningarstöðina í þeim tilgangi að ganga til liðs við þjóðvarnarlið Íraka, þegar lítil Toyota-rúta sprakk í loft upp á markaðstorgi sem ráðningarstöðin stendur við. Allt tiltækt heilbrigðisstarfsfólk úr nærliggjandi bæjum var kallað út til þess að huga að hinum særðu. Að minnsta kosti 68 létu lífið í sprengingunni og á sjötta tug særðust og óttast er að tala látinna gæti enn átt eftir að hækka. Sprengingin er sú mannskæðasta síðan 24. júní, þegar 89 manns létu lífið í samræmdum árásum skæruliða í mið- og norðurhluta Íraks. Síðan valdaskiptin áttu sér stað í Írak fyrir nákvæmlega mánuði síðan hafa fjölmargar sprengjuárásir átt sér stað í bænum Baquba, sem er tæpa 50 kílómetra norður af Bagdad. Árásirnar hafa einkum beinst að þjóðvarnarliði Íraka og hersveitum Bandaríkjamanna. Hinir látnu í dag voru hins vegar langflestir óbreyttir borgarar. Suð-austur af Bagdad geysuðu harðir bardagar á milli skæruliða og írakskra, úkraínskra og pólskra hermanna í morgun. Sjö írakskir lögreglumenn létust í bardögunum og 35 skæruliðar féllu í valinn en ekki varð mannfall meðal pólskra eða úkraínskra hermanna. Þá særðust 10 lögreglumenn í átökunum og 40 skæruliðar voru handteknir. Auk fyrrgreinds blóðbaðs lést einnig einn maður og nokkrir særðust í sprengingu fyrir utan lögreglustöð í Bagdad í morgun. Ráðamenn í Írak hafa nú miklar áhyggjur vegna ráðstefnu sem haldin verður í Baghdad eftir þrjá daga, þar sem 1000 manna hópur þingmanna og sendifulltrúa kemur saman og velur 100 manna þjóðarráð, sem verður nýrri stjórn Íraka innan handar. Óttast er að árásirnar í dag séu skilaboð skæruliða fyrir fundinn í Bagdad.