Ólögleg áfengissala í Svíþjóð

Lögreglan í Svíþjóð telur að nær annar hver matvörukaupmaður í Malmö stundi ólöglega sölu á áfengi. Smygl á áfengi hefur aukist um helming síðastliðin fjögur ár og það verður sífellt algengara að verslað sé með áfengi sem keypt er í öðrum ESB-ríkjum en í Svíþjóð, að því er fram kemur á norræna fréttavefnum. Þar segir einnig að auk ólöglegrar áfengissölu sé verslað með smyglað tóbak sem selt sé unglingum undir aldri. Áfengið og tóbakið komi aðallega frá Póllandi og Þýskalandi. Refsing við ólöglegri áfengissölu er yfirleitt sekt en þeir sem selja smyglað áfengi þéna jafnvirði einnar sektar á einni ferð sem þeir fara í til að sækja áfengi.