Gagnrýndi repúblikana harkalega

"Demókratar vilja byggja Bandaríkin á sameiginlegri ábyrgð og sameiginlegum tækifærum. Repúblikanar trúa því að rétta fólkið eigi að stjórna Bandaríkjunum, þeirra fólk," sagði Bill Clinton, fyrrum forseti Bandaríkjanna, þegar hann ávarpaði flokksþing demókrata í Boston. Demókratar tefldu fram stórstjörnum sínum á fyrsta degi flokksþingsins sem lýkur á morgun með því að John Kerry þiggur útnefningu flokksins sem forsetaefni hans í haust. Fyrrum forsetarnir Jimmy Carter og Bill Clinton, Al Gore fyrrum varaforseti og forsetaefni demókrata, og Hillary Clinton, öldungadeildarþingmaður og fyrrum forsetafrú, lofsungu Kerry og hétu því að gera sitt besta til að tryggja að hann næði kjöri. Clinton hjónunum var fagnað með miklum látum þegar þau hófu ræður sínar. Gore kom á óvart með því að krydda harða gagnrýni sína á núverandi forseta með gríni og Carter kom á óvart með því að vera neikvæðari í garð George W. Bush en búist hafði verið við.