Hryðjuverkabæklingur í Bretlandi

Tuttugu og tveggja síðna upplýsingabæklingi hefur verið dreift inn á hvert heimili auk þess sem auglýsingaherferð var hrint af stað í gær. Innanríkisráðuneytið sagði að með herferðinni væri verið að bregðast við niðurstöðum úr nýrri rannsókn sem sýndi að almenningur óskaði eftir ráðgjöf á þessu sviði. Markmiðið er að hjálpa almenningi að undirbúa sig fyrir hryðjuverkaárásir eða neyðarástand. Bæklingurinn sýnir grundvallaratriði skyndihjálpar og inniheldur öll helstu neyðarnúmer sem þörf er á. Auk þess eru gefnar hagnýtar ráðleggingar varðandi ýmislegt, svo sem að koma sér upp birgðum af dósamat, flöskuvatni og rafhlöðum. Fyrstu viðbrögð fólks við hryðjuverkaárás eða öðrum hörmungum er að koma sér í öruggt húsaskjól og fylgjast með upplýsingum.