Gripið verði til refsiaðgerða

Evrópusambandið vill að Sameinuðu þjóðirnar grípi til refsiaðgerða gegn Súdönum bindi þeir ekki þegar í stað enda á átökin í Darfur-héraði. Bandaríkjamenn hafa þegar lýst sig sömu skoðunar og telja átökin í Súdan jafngilda þjóðarmorði. Utanríkisráðherrar Evrópusambandsins gengu ekki svo langt en lýstu miklum áhyggjum af ástandinu í Darfur. Skýrslur um mannréttindabrot komi sífellt fram, þar á meðal frásagnir af nauðgunum í stórum stíl. Ráðherrarnir segja að súdönsk stjórnvöld verði beitt þrýstingi til þess að rannsaka málið og láta vígamennina svara til saka. Kofi Annan, framkvæmdastjóri Sameinuðu þjóðanna, mun í vikunni hitta leiðtoga Afríkuríkja að máli til þess að ræða ástandið í Darfur. Átök milli arabískra vígamanna og blökkumanna í Darfur-héraðinu hafa staðið yfir í rúmt ár og kostað 30.000 lífið, aðallega blökkumenn. Um milljón hefur neyðst til þess að flýja heimili sín af völdum átakanna.