Réttarhöldunum sífellt frestað

Réttarhöldum yfir morðingja hálfíslenskrar konu í Pensacola í Bandaríkjunum hefur verið frestað í áttunda sinn. Lögfræðingar, sem sérhæfa sig í að verja hagsmuni brotaþola, fylgjast grannt með málarekstrinum. Dómarinn samþykkti að fresta réttarhöldunum yfir Sebastian Dexter Young þar sem verjandi hans átti í erfiðleikum með að fá gögn um veru hans í hernum. Young á yfir höfði sér dauðarefsingu fyrir að skjóta fyrrverandi konu sína, Lucelle Mosco, til bana með haglabyssu og særa sextán ára son hennar af fyrra hjónabandi, Jón Atla Júlíusson, lífshættulega með því að skjóta hann og stinga oftsinnis með hnífi. Lucelle Mosco átti íslenska móður. Lögmenn í Bandaríkjunum, sem annast réttargæslu fyrir fórnarlömb glæpa, fylgjast vel með réttarhöldunum í Pensacola og gagnrýna hvað þau dragast á langinn. Morðið var framið í mars í fyrra. Því lengra sem frá líður, þeim mun líklegra er að fólk gleymi, segir Nancy Newland, fyrrverandi formaður Favorhouse sem er þjónustumiðstöð fyrir brotaþola. Hún segir að það sé óþolandi staða fyrir lögfræðinga. Réttarhöldunum hefur áður verið frestað vegna rannsókna á geði sakborningsins en úr þessu verður þeim ekki fram haldið fyrr en um mánaðamótin október/nóvember. Málið vakti mikla athygli í Bandaríkjunum á sínum tíma þar sem Sebastian Dexter Young hafði brotið nálgunarbann sem á hann var sett eftir að hann hafði beitt Lucelle Mosco ýmsu harðræði. Lögreglan var harðlega gagnrýnd fyrir að vernda hana ekki betur og fjölskyldu hennar. Sonur hennar, Jón Atli, fluttist til Íslands eftir árásina. Hægt er að horfa á nýlega frétt bandarísku sjónvarpsstöðvarinnar WEAR-TV um málið með því að smella á hlekkinn hér að neðan:  http://www.weartv.com/news/Stories/July/0714/young.shtml Myndin er af Jóni Atla sem lifði naumlega af árásina.