Mannskætt lestarslys í Tyrklandi

Að minnsta kosti fjörutíu manns fórust og sextíu slösuðust í lestarslysi í Tyrklandi í morgun. Hraðlest fór þá út af brautarteinum á milli borganna Istanbul og Ankara. Þetta er eitt versta lestarslys í sögu Tyrklands en gagnrýnendur höfðu varað við því að gamlir brautarteinar á þessari leið myndu ekki ráða við nýrri og hraðskreiðari gerðir lesta. Að minnsta kosti fjórir vagnar fóru út af sporinu nærri þorpinu Mekece en mestar skemmdir urðu á tveimur vögnum sem rákust saman. Slysið átti sér stað rétt fyrir klukkan átta að morgni að staðartíma. Ekki er vitað nánar um tildrög slyssins en lestin var komin hálfa leið áleiðis til höfuðborgarinnar Ankara.