Japanar óvissir um framsal

Japanar segjast þurfa meiri tíma áður en ákvörðun verður tekin um hvort Bobby Fischer, fyrrverandi heimsmeistari í skák, verði framseldur til Bandaríkjanna. Þar á Fischer yfir höfði sér fangelsisvist og fjársektir vegna brots á viðskiptabanni við Júgóslavíu en árið 1992 tefldi Fischer einvígi við Boris Spasský þar í landi. Það var í fyrsta sinn sem unnt var að fá hann að skákborðinu í tuttugu ár, eða frá því hann sigraði Spasský í heimsmeistareinvíginu í Reykjavík 1972. Skáksamband Ísland skoraði í gær á George Bush Bandaríkjaforseta að náða Fischer og draga til baka ákæru á hendur honum. Fischer hefur nú verið í fangelsi í vikutíma í Tokýó en hann var handtekinn á leiðinni til Filippseyja með falsað vegabréf. Myndin er frá einvígi Fischers (t.h.) og Spasský í Júgóslavíu haustið 1992.