Shrek er mættur aftur

Græna tröllið Shrek sneri öllum sætu Disney-útgáfum gömlu ævintýranna á hvolf í drepfyndinni tölvuteiknimynd sem bar nafn hans og kom í bíó árið 2001. Shrek sló hressilega í gegn og vinsældir myndarinnar voru slíkar að framhald var óhjákvæmilegt og nú er Shrek mættur á nýjan leik ásamt hinum hundtrygga Asna og Fíónu prinsessu. Þá eru fleiri ævintýrapersónur úr fyrri myndinni að sjálfsögðu enn á kreiki og fer þar nokkuð fyrir Gosa sem er enn að ljúga og reyna að breiða yfir vafasaman nærfatasmekk sinn. Framleiðendur Shrek 2 gerðu sér þó fulla grein fyrir að það þýddi ekki að hjakka í sama farinu og því mæta fjölmargar nýjar og skemmtilegar persónur til leiks en það er ekki á neinn hallað þó það sé fullyrt að þar fari Antonio Banderas fremstur í flokki í hlutverki Stígavélakattarins. Shrek 2 hefur skilað milljónum dollara í kassann á mettíma frá frumsýningu og þriðja myndin er því að sjálfsögðu í burðarliðunum. Það voru ekki síst frábærar persónur, stórleikur Mike Meyers í hlutverki Shrek og snilldartilþrif Eddie Murphy í rullu Asnans sem gerðu Shrek að dásamlegri skemmtun fyrir börn og fullorðna en þó  má ekki gleyma bráðsmellnum útúrsnúningi á gömlu ævintýrunum sem hvert mannsbarn þekkir. Þrátt fyrir fíflaganginn endaði Shrek eins og öll ævintýri eiga að gera; aðalpersónan fékk prinsessuna sína (þau voru að vísu ekki glæsimenni og þrusugella heldur tvö græn, illa lyktandi tröll) og allt benti til þess að þau myndu lifa hamingjusöm upp frá því. Að vísu ekki í höll heldur forarmýri. Handritshöfundarnir voru þarna komnir í ákveðna klemmu þar sem þeir gengu inn í ævintýraformið en þeir voru þó ekki lengi að finna snjalla útleið. "Ég gerði mér grein fyrir því að við höfðum málað okkur út í horn," segir leikstjórinn og handritshöfundurinn Andrew Adamson.  "Við leyfðum Shrek að kvænast Fíónu og halda á vit hamingjunnar. Upp úr þessum vanda fundum við svo alveg nýjan vinkil þegar ég fór að hugsa um hvað gerist eftir giftinguna. Hugmyndin er þá að þegar þú gengur í hjónaband ertu ekki aðeins að gangast maka þínum á hönd heldur allri fjölskyldunni hans." Shrek þarf því núna að fara á fund tengdaforeldra sinna og þá verður hjónabandssælan skammvinn. Faðir Fíónu vill ekki sjá Shrek sem tengdason og sættir sig enn síður við að fallega dóttirin sé orðinn að skessu. Ekki bætir það úr skák að fláráð Álfadís hefur hreðjatak á konunginum og hafði gert samkomulag við hann um að Fiona giftist Draumaprinsinum, syni sínum. Kóngsi bregður því á það ráð að fá leigumorðingja, Stígvélaða köttinn, til þess að koma Shrek fyrir kattarnef. Málin þróast þó í óvæntar áttir en það er í það minnsta óhætt að segja að Asninn hitti ömmu sína í Stígvélaða kettinum þar sem nú keppa tvö þreytandi, talandi dýr um athygli Shreks og áhorfenda. Brandararnir koma, sem fyrr á færibandi, í nýju myndinni og Asninn og Kötturinn eru aðalstuðboltarnir. Höfundar Shrek 2 halda áfram að snúa út úr gömlum ævintýrum en skemmta einnig sjálfum sér og áhorfendum með snjöllum vísunum í þekktar bíómyndir og þannig má sjá persónur í kunnuglegum aðstæðum úr Lord of the Rings, Spider-Man, Mission: Impossible og svo mætti lengi telja.