Páfi í pílagrímsför

Jóhannes Páll páfi annar hélt í pílagrímsför til lindanna í Lourdes í Frakklandi sem margir telja að lækni ýmis mein þeirra sem halda þangað í pílagrímsför. Páfi var veiklulegur, rödd hans lág og virtist óstöðugur þegar hann kraup í bæn á staðnum helga. Hann vitnaði þar til eigin veikinda, nokkuð sem hann er ekki gjarn á að gera. "Ég deili með ykkur æviskeiði sem einkennist af líkamlegri þjáningu en er þrátt fyrir það engu síðri en önnur æviskeið í hinni dásamlegu sköpun Guðs," sagði í ávarpi Jóhannesar Páls páfa annars sem var lesið upp af aðstoðarmanni hans. Páfi hafði áður rætt við Jacques Chirac Frakklandsforseta. Þá þótti ljóst að hann átti erfitt og síðar gerði hann ekki tilraun til að flytja ávarp sitt sjálfur. "Kæru bræður og systur sem þjáist. Mikið vildi ég faðma ykkur öll að mér af ástúð og segja ykkur hversu nærri ég stend ykkur og hversu mikið ég vil styðja við bakið á ykkur," sagði páfi í gegnum aðstoðarmann sinn. Páfinn þjáist af parkinsonveiki auk þess sem hné hans og mjöðm eru farin að gefa sig.