Mjórra og lengra Prins Póló

Vanafastir Prins Póló unnendur hafa líklegast tekið eftir því að pólska súkkulaðikexið hefur tekið nokkrum breytingum. Þó bara á útsölustöðum Essó, eins og er, en bráðlega mun breytingin verða til frambúðar í öllum sjoppum. "Málið er að við erum að fá nýtt Prins Póló en það komu þó á undan nokkur eintök á Essó-stöðina í pólskum umbúðum vegna þess að þeir flytja þetta beint inn sjálfir," segir Þorgeir Pétursson, deildarstjóri sælgætis hjá Ásbirni Ólafssyni ehf. "Þetta er með meira súkkulaði. Við munum kynna þetta sem nýtt Prins Póló. Þeir sem þekkja Prinsið eins og það er núna fá þá mjórra og lengra. Prins Póló er að breytast. Hér eftir verður það á pólsku fyrir Pólland og á íslensku fyrir Íslendinga." Þorgeir segir að bragðið muni þó ekki taka miklum breytingum. "Þegar það kemur ætlum við að gefa mikið af því, svona til þess að leyfa fólki að smakka. Þessu var eiginlega þjófstartað fyrir okkur." Prins Póló léttist úr 40g í 38g en Þorgeir gat ekki gefið upp hvort fitumagnið breytist mikið með auknu súkkúlaðimagni. Ekkert hefur enn verið ákveðið með hvort verðið breytist í kjölfarið. "Þá á bara eftir að skoða það og við gerum það um leið og þetta skilar sér í hús," segir hann að lokum.