Á fjórða þúsund án heimilislæknis

Á milli þrjú til fjögur þúsund manns eru án heimilislæknis í Reykjavík, Kópavogi og á Seltjarnarnesi. Guðmundur Einarsson, forstjóri Heilsugæslunnar í Reykjavík, segir að hjá heimilislækni eigi að vera upplýsingar um nánast öll samskipti sjúklinga við heilbrigðiskerfið. Sé fólk án heimilislæknis sé ekki svo. Guðmundur segir tíu af þrettán heilsugæslustöðvum á svæðinu geta tekið við beiðnum fólks um lækni. Það eigi þó að geta sótt læknisþjónustu á heilsugæslu síns hverfis þrátt fyrir að vera án heimilislæknis. Ný heilsugæslustöð í Salarhverfi í Kópavogi taki við skráningum víðar að en úr hverfinu: "Hún réði kannski ekki við ef allir þessir þrjú til fjögur þúsund kæmu í einu þangað en þeir sem beinlínis þurfa á þjónustu að halda eiga að geta fengið skráningu." Ný heilsugæslustöð í Voga- og Heimahverfi í Reykjavík og stækkun heilsugæslustöðvarinnar í Árbæ, þangað sem íbúum Grafarholts sé beint, leysi mesta vandann.