Sýnum stórhug

Finnst engum skjóta skökku við að á meðan mestu náttúruhamfarir og hörmungar sögunnar ganga yfir í heiminum og þörf er á margra milljóna dala aðstoð, skuli Íslendingar sprengja upp 400 milljónir íslenskra króna og halda sín hefðbundnu áramót eins og ekkert hafi í skorist? Mér fannst hreinlega fáránlegt að horfa á fréttir fyrr í kvöld þar sem sagt var með stolti frá því að rausnarleg íslenska þjóðin væri búin að skrapa saman rúmlega 20 milljónum til styrktar fórnarlömbum flóðanna, en stuttu síðar birtist frétt um að við myndum væntanlega eyða 400 milljónum í flugelda um þessi áramót! Hvernig væri að kaupa helmingi minna af flugeldum en áætlað var og láta samsvarandi upphæð renna til hjálparstarfsins? Þar með væru komnar 200 milljónir! Ég er ekkert að reyna að skemma fyrir íslenskum hjálparsveitum og fjáröflunum þeirra...en þurfa ekki aðrir á peningunum að halda núna? Ég er að minnsta kosti ekki viss um að ég geti með góðri samvisku notið þess að horfa á flugeldana þessi áramót. Það eru nú einu sinni jól, er ekki hægt að “fórna” áramótunum eitt skipti og hjálpa meðbræðrum okkar í staðinn? Vissulega er þetta langt í burtu en þetta fólk getur ekki leitað annað en til okkar, annarra íbúa þessa heims. Ég er viss um að Íslendingar myndu þiggja aðstoð frekar en flugeldasýningar ef náttúruhamfarir hrelldu okkar litlu þjóð, sem er alls ekki fjarlægur möguleiki. Ætli Íslendingar geti sýnt STÓRhug en ekki bara þennan margumtalaða samhug svona til tilbreytingar? Gleðilegt ár!