Evrópa með 6 stiga forskot

Evrópuliðið hefur sex stiga forskot á það bandaríska, 11–5, fyrir síðasta daginn í Ryder-bikarnum en bandaríska liðið stóð sig þó aðeins betur í gær en fyrsta daginn sem Evrópa burstaði  þá 6,5-1,5. Evrópa vann annan daginn 4.5–3.5 og vantar því aðeins þrjú stig af tólf mögulegum í dag til þess að halda Ryder-bikarnum innan sinna raða. Bandarísku kylfingunum gengur afar illa að vinna saman ef marka má fyrstu tvo daganna. Evrópubúar hafa því öll spil á hendi til þess að vinna Ryder-bikarinn annað skiptið í röð og í sjöunda sinn í tíu keppnum. Síðasti keppnisdagurinn er í dag þar sem fara fram 12 einstaklingskeppnir. Þar hafa Bandaríkjamenn jafnan verið sterkari en þeir þurfa að vinna upp sex stiga forskot sem kemur til með að verða mjög erfitt.