Nöfn Íslendinganna ekki gefin upp

Íslendingur á Pattaya í Taílandi undrast að stjórnvöld sem leita Íslendinga í landinu hafi ekki spurst fyrir um ferðir fólksins meðal þeirra rúmlega eitt hundrað Íslendinga sem þar séu. Ekki hefur verið haft upp á fimm Íslendingum í Taílandi eftir flóðbylguna í sunnanverðir Asíu auk fimm sem talið er að séu á Balí. "Við hér bíðum eftir því að fá nafnalista eða myndir til að átta okkur á því hvort við könnumst við fólkið," segir Þorfinnur Kristjánsson á Pattaya. Pétur Ásgeirsson, forsvarsmaður neyðarvaktar utanríkisráðuneytisins, segir sannarlega hafa verið leitað til Íslendinga. Haft hafi verið samband við fólk sem talið hafi verið líklegast til að þekkja til. Innan utanríkisráðuneytisins hafi verið metið svo að litlar líkur væri á að fólkið væri í hættu. Meiri hagsmunir lægju því í að hlífa fólkinu fyrir að nöfnum þeirra og myndum yrði dreift um samfélagið en að hafa upp á því með þeim hætti. Kjartan Borg, ræðismaður Taílands á Íslandi, segir myndir til af þeim af þeim Íslendingum sem saknað sé í Taílandi. Hann hallist að því að í lagi sé með fólkið. Hins vegar gefi fólk ekki alltaf upp réttan dvalarstað. Nefnir hann sem dæmi að átta Íslendingar sem séu á Patong á Phuket-eyju hafi sagst ætla að dvelja í Bangkok. Pétur segir að vegna dæma sem þessara sé fólksins leitað. Ómar Valdimarsson sem vinnur á vegum Rauða krossins í Indónesíu er í jólafríi á Balí. Hann grenslast fyrir um fimm manna fjölskyldu þar, íslenska konu, sænskan mann hennar og þrjú stálpuð börn þeirra sem ekki hafi náðst í. Þau séu óhult frá flóðinu hafi þau ekki ferðast frá Balí. Auk fjölskyldunnar hafa tvö pör á Pattaya, annað með barn, ekki komið í leitirnar. Pétur segir að fregnir hafi fengist af öðru parinu fyrir nokkrum dögum. Einmitt í gegnum Íslendinga á Pattaya. Þær hafi ekki fengist staðfestar.