Ekkert fikt með flugeldana

"Ef fólk fer rétt með skoteldana og fylgir leiðbeiningum þá er hættan af þeim hverfandi," segir Valgeir Elíasson, upplýsingafulltrúi Slysavarnafélagsins Landsbjargar. Hann segir alvarlegustu slysin verða þegar strákar séu að fikta í flugeldunum, safna saman púðrinu úr þeim og búa til stærri sprengjur. "Við ætlum að einbeita okkur að því í ár að koma í veg fyrir að verið sé að leika sér með púðrið. Bæði eiga afgreiðslumenn að vera duglegir við að ræða þessi mál við strákana og eins verða foreldar að vera vakandi yfir því hvað börnin þeirra eru að gera. Slysin í fyrra voru flest af völdum fikts og þau slys urðu einkum dagana fyrir áramót. Meirihluta flugeldaslysa á gamlárskvöld má hins vegar rekja til áfengisnotkunar og það er annað vandamál. Það verður aldrei of brýnt fyrir fólki að brennivín og flugeldar passa engan veginn saman." Valgeir segir þýðingarmikið að skera flipana vel af kössum utan af tertum annars geti þeir breytt skotstefnunni. Þá biður hann fólk að huga vel að skepnum. Húsdýr beri að loka inni með ljósi og tónlist svo þau verði síður vör hávaðans og hann bendir þeim sem kveðja árið í sumarbústað á að gæta að hvort hrossastóði í nágrenninu geti hugsanlega stafað hætta af sprengingunum. Góðu fréttirnar segir Valgeir þær að nánast hafi náðst að útrýma augnslysum síðan farið var að nota hlífðargleraugu, enda um 70 þúsund flutt inn af þeim árlega. Hann segir merkingar á skoteldunum líka alltaf í þróun. "Við erum með mjög nákvæmar öryggisleiðbeiningar á íslensku og einnig skýrar myndir af hlutunum enda verðum við að forðast slysin. Þetta á að vera ánægjutími og hann verður það ef farið er eftir settum reglum," segir Valgeir að lokum.