Ruðst inn í sendiráð

Andstæðingar Kárahnjúkavirkjunar ruddu sér leið inn í íslenska sendiráðið í London í gær, að því er fram kom í fréttum Sjónvarpsins í gærkvöld. Þar sagði að fólkið hefði viljað mótmæla Kárahnjúkavirkjun og tekið sér stöðu í sendiráðinu. Starfsfólk sendiráðsins kallaði eftir hjálp lögreglu, sem kom og handtók fólkið. Ekki var ljóst í gærkvöld hvort mótmælendurnir væru félagsmenn í einhverjum samtökum sem eru andvíg framkvæmdunum. Málið var til rannsóknar hjá lögreglu.