Árás á Heathrow undirbúin

Hryðjuverkamenn ætluðu að gera árás á Heathrow-flugvöll við London samkvæmt upplýsingum frá pakistönsku leyniþjónustunni. Nýjar upplýsingar gefa einnig til kynna að Al-Kaída hafi uppi áform um að gera árásir á flutningaskip. Handtökurnar í Bretlandi síðustu daga voru að öllum líkindum byggðar á upplýsingum sem fengust þegar meðlimur úr Al-Kaída samtökunum, Naeem Noor Khan, var handtekinn í Lahore í Pakistan í byrjun júlí. Khan er tölvunarfræðingur og fjölmörg gögn fengust úr tölvum hans sem benda til að samtökin voru að skipuleggja árásir á Heathrow-flugvöll í Lundúnum. Upplýsingar um mennina tólf í Bretlandi fundust í gögnum Khans að sögn talsmanna leyniþjónustu Pakistans. Talið er að einn af þeim sé háttsettur meðlimur úr Al-Kaída og hugsanlega var hann yfir breskum armi samtakanna. Hann átti líklega þátt í að undirbúa árás á flugvöllinn því hann hafi verið í tölvupóstsambandi við Khan. Leyniþjónustan segir þessa hryðjuverkamenn hafa tengsl um allan heim og ef takast eigi að leita þá uppi, og ekki aðeins hrekja þá frá stöðvum sínum heldur gera þá óvirka, verði að koma á mjög virkri samvinnu milli hagsmunaaðilanna. Nýjar upplýsingar benda einnig til að Al-Kaída hafi ætlað að gera árásir á flutningaskip til að trufla eða hafa neikvæð áhrif heimsverslun en engar upplýsingar fengust um það hvort árásirnar væru bundnar við bresk skip. Ekki hefur fengist staðfest hvort viðbúnaðurinn í Washington og New York í tengslum við hugsanlegar árásir á fjármálastofnanir sé kominn til vegna nýrra upplýsinga frá Pakistan. Myndin sýnir vopnaðan lögreglumann við gæslu á Heathrow-flugvelli í dag.