Eurocorps tekur við í Afganistan

Herdeildir Eurocorps tóku við yfirstjórn Atlantshafsbandalagsins í Afganistan af kanadíska hernum í morgun en hann hefur stjórnað herdeildum NATO þar í landi frá því í janúar. Eurocorps var sett á laggirnar árið 1992 og er viðbragðsher sem NATO eða Evrópusambandið getur sent til átakasvæða með skömmum fyrirvara. Hermenn frá Frakklandi, Þýskalandi, Belgíu, Lúxemborg og Spáni eru í sveitunum. Hallgrímur Sigurðsson, sem stjórnar Kabúl-flugvelli fyrir NATO, var viðstaddur hátíðlega athöfn í morgun og kemur nú til með að lúta yfirstjórn franska hershöfðingjans Jean Louis Py sem er æðsti yfirmaður herafla Eurocorps. Myndin er frá skiptunum í morgun.