Bjargað úr jarðgöngum á Indlandi

Tuttugu byggingaverkamönnum, sem höfðu setið fastir í jarðgöngum eftir miklar rigningar í afskekktu þorpi á Himalayja-svæðinu á Indlandi, var bjargað í nótt. Göngin eru hluti byggingaframkvæmda við orkuver og höfðu mennirnir verið innilokaðir í sólarhring. Þeir lokuðust inni þegar jarðvegur hrundi fyrir útganginn vegna rigninganna. Lögregla segir að allir tuttugu hafi náðst út og að nóg súrefni hafi verið í kílómetralöngum göngunum. Stórvirkar vinnuvélar þurfti til að grafa mennina út og auðvelduðu rigningar í nótt björgunarstörfin.