Sex lík í blóði drifinni íbúð

Fjórir hafa verið handteknir í tengslum við hrottaleg morð í Flórída í Bandaríkjunum. Lík fjögurra manna og tveggja kvenna fundust í heimahúsi í bænum Deltona, 40 kílómetrum norður af Orlando. Aðkoman var hroðaleg, líkin illa útleikin og blóðslettur um allt. Ekki liggur fyrir hvað bjó að baki morðunum eða hvernig þau bar að. Líkin fundust þegar samstarfsmenn eins hinna myrtu á hamborgarastaðnum Burger King söknuðu hans í vinnu. Þegar farið var heim til mannsins til að vitja hans, blasti ófögur sjón við samstarfsmönnunum. Líkin voru á víð og dreif um íbúðina, veggir og gólf atað blóði. Hin myrtu voru á aldrinum 18 til 30 ára, en ekki hafði tekist að bera kennsl á lík annarrar konunnar í gær. Þetta er versta fjöldamorð í Flórída síðan 1999 þegar maður skaut átta manns til bana á bílasölu áður en hann framdi sjálfsmorð. Bifreið hans hafði verið innkölluð þar sem hann hafði ekki staðið í skilum.