Hætta á miltisbrandi á Íslandi

Óttast er að bráð smithætta geti skapast hér á landi vegna miltisbrands sem leynist víða í jörð. Embætti yfirdýralæknis brýnir fyrir þeim sem grafa skurði, taka grunna að húsum eða setja niður rotþrær að gæta ítrustu varúðar ef dýraleifar koma upp á yfirborðið. Miltisbrandur er best þekktur sem eitt hættulegasta sýklavopn sem hægt er að beita. Það er eiturefni sem búið er til út bakteríum sem geta lifað mjög lengi í jörð, jafnvel 200 ár eða lengur. Þær valda lífshættulegum og bráðum smitsjúkdómi sem getur sýkt öll dýr með heitt blóð. Þessi sjúkdómur var hér á landi fram til ársins 1965 og olli talsverðum búsifjum, einkum vestanlands og -sunnan þar sem nokkurt manntjón varð af hans völdum. Smithætta leynist því víða í jörðinni. Sigurður Sigurðarson dýralæknir segir að víða sé farið að hreyfa jörð, m.a. við byggingu sumarbústaða, og eru líkur á að fyrr eða síðar komi menn niður á grafir þar sem smithætta leynist,og þá er fjandinn laus að sögn Sigurðar. Hann segir því brýnt að fólk sýni varúð vegna þess að hætta skapast um leið og jörð er hreyfð þar sem miltisbrandshræ eru til staðar. Ef komið er niður á dýrabein verði að kalla til menn sem viti hvað eigi að gera. Sigurður skorar á sveitarstjórnir að hefja athugun á því hvort sögur eða nákvæmar upplýsingar eru til um miltisbrandstilfelli og -grafir og merkja slíka staði til að hefta útbreiðslu sjúkdómsins. Hann getur borist í meltingarveg með menguðum mat eða fóðri og valdið bráðri bólgu. Sýklarnir geta einnig borist í sár og valdið vessandi drepbólum og miklum bólgum. Loks geta sýklar borist ofan í öndunarfærin og valdið bráðri og skæðri lungnabólgu og lungnabilun vegna blæðinga. Sem betur fer eru þó til lyf við þessu að sögn Sigurðar, t.d pensillín, og þá skiptir máli að átta sig fljótt á stöðu mála og hefja lyfjameðferð strax.