Klára 33 ára dæmi

Hin goðsagnakennda rokkhljómsveit Deep Purple kom til landsins í gær. Þeir Ian Gillan, Roger Glover, Ian Paice, Don Airey og Steve Morse hittu fréttamenn að máli í gær og voru í góðu stuði. Sveitin hélt síðast tónleika á Íslandi 18. júní 1971 og félagarnir sögðust vera komnir til að klára tónleikana sem enduðu í rafmagnsleysi fyrir 33 árum. Þá létu þeir það fylgja sögunni að þeir biðu spenntir eftir að fá að spila fyrir Íslendinga á ný. Það var uppselt á tónleikana 1971 og allt stefnir í að sagan endurtaki sig nú en sveitin heldur tvenna tónleika að þessu sinni í kvöld og annað kvöld. Það er "gjörsamlega uppselt á seinni tónleikana," segir Einar Bárðarson tónleikahaldari. "En enn eru örfáir miðar eftir á tónleikana í kvöld og þeir eru sem fyrr seldir á Hard Rock Cafe." Deep Purple er komin á spjöld íslenskrar rokksögu fyrir það að hafa selt flesta aðgöngumiða á rokktónleika á Íslandi með samanlagðri miðasölu áranna 1971 og 2004. Þeir Gillan, Glover og Paice hafa verið í hljómsveitinni frá upphafi en Airey og Morse slógust í hópinn fyrir nokkrum árum. Steve Morse hefur meðal annars verið valinn gítarleikari ársins fimm sinnum af tímaritinu Guitar Player. Þessi liðsskipan hefur verið á fleygiferð um heiminn síðastliðin tvö ár og hefur leikið við góðar undirtektir. Sveitin mun leika nýtt og gamalt efni í bland í Laugardalshöllinni en kapparnir segja að það munu þó bera meira á gamla, sterka efninu sem sveitin er þekktust fyrir.