Aldrei séð meiri fátækt

"Ég hef verið við hjálparstörf í suðurhluta Afríku í fjögur ár og hef aldrei séð jafn mikla fátækt," segir Hjördís Guðbjörnsdóttir hjúkrunarfræðingur en hún er einn þriggja sendifulltrúa Rauða kross Íslands í Darfurhéraði í Súdan. Hjördís sinnir heilsugæslu í Abshok flóttamannabúðunum í norðurhluta Darfur en um 50 þúsund manns eru nú í búðunum og fer fjölgandi. Búðirnar eru í miðri eyðimörk og aðstæður voru ákaflega erfiðar fyrir hjálparstarfsmennina sem fyrstir komu. Skortur á hreinu drykkjarvatni og veikindi settu sitt mark á starfið. "Þetta tekur sýnilega mjög á hjálparstarfsmenn," segir Hjördís en bætir við að miklu hafi verið komið til leiðar. "Um það bil 250 manns leita til heilsugæslunnar daglega og við höfum komið upp aðstöðu fyrir ungbarnavernd sem mæður geta leitað til." Súdönsk yfirvöld hétu í síðustu viku að hlíta ályktun Sameinuðu þjóðanna og afvopna vígasveitir. Hjördís segist eiga erfitt með að greina hvort ástandið hafi breyst síðan þá. "Við verðum ekki beinlínis vör við breytingarnar sem eiga sér stað, við heyrum mestmegnis fregnir utan frá. En það er greinilegt að það er spenna vegna málsins og súdönsk yfirvöld hafa farið fram á meiri tíma til að afvopna vígasveitir." Hjördís segir að hjálparstarfsmönnum sé tekið afar vel af Súdönum og hún finni ekki fyrir neinum óþægindum. Abshok búðirnar séu jafnvel öruggari en hún hafi átt að venjast. Alþjóðadeild Rauða krossins sá um skipulag búðanna sem Hjördís telur að séu til fyrirmyndar. "Búðirnar eru ákaflega vel hannaðar, skipt í hverfi og götur og daglegt líf gengur með ró og spekt. Hjálparstofnanir reyna að sjá fólki fyrir nauðsynjum og í útjaðri búðanna hefur verið komið upp markaði þar sem fólk getur reynt að verða sér úti um það sem það vanhagar um. Hjördís segir að búðirnar geti laðað að fólk sem er að leita sér betri lífsskilyrða vegna almennrar fátæktar. "Við erum fyrst og fremst að reyna að koma lífinu í sama horf og það var áður en átökin hófust svo fólk geti haldið áfram með líf sitt. Aðspurð hvort hún sjái fram á að átökin verði til lykta leidd á næstunni segist Hjördís lifa í voninni. "Við vonum að stjórnvöld taki málin föstum tökum en Rauði krossinn er ekki í pólitískum átökum heldur leggjum við áherslu á að aðstoða fólkið í landinu og reynum að sjá til þess að mannréttindalög séu virt."