Frakkar búa sig undir mikinn hita

Frakkar undirbúa sig fyrir væntanlega hitabylgju, en í fyrra létust um fimmtán þúsund manns vegna mikilla hita. Sérfræðingar hafa áhyggjur af því að ekki verði hægt að nýta um þriðjung sjúkraplássa vegna sumarfría í landinu. Í ágúst í fyrra fór hiti oft upp fyrir 40 gráður og spáð er svipaðri hitabylgju á næstunni. Samtök lækna á neyðarmóttöku hafa gert könnun á starfsmannafjölda á frönskum spítölum yfir sumartímann og eru 20 til 30 prósent færri rúm í boði. Þeir segja að mikill vandi sé á höndum ef svipaðar mannlegar hörmungar eins og í fyrra endurtaki sig í ár. Frönsk stjórnvöld vilja þó læra af reynslunni og hefur sem dæmi verið útbúinn sérstakur upplýsingabæklingur fyrir eldri borgara, sem eru í mestri hættu. Þar er eldra fólki til dæmis bent á að láta vita ef það er eitt og byrjar að líða illa í hitanum. Um 80 prósent dvalarheimila aldraðra í Frakklandi eru nú búinn svokölluðum kæliherbergjum, almennu rými með loftræstingu. Gagnrýnt hefur verið að sums staðar hafi fjármagn, sem ætlað var í fyrirbyggjandi aðgerðir vegna mikilla hita, verið nýtt í annað.