Rændir af mönnum í löggubúningi

Tveir mexíkóskir myndatökumenn segja að þrír menn hafi rænt sig í Aþenu í Grikklandi í gærkvöldi, og að ræningjarnir hafi dulbúið sig sem lögreglumenn. Myndatökumennirnir voru stöðvaðir af þremur mönnum sem töluðu spænsku og báðu um skilríki. Lögreglumennirnir sögðust vera að rannsaka kólumbískan eiturlyfjahring. Mexíkóarnir afhentu þeim veskin sín og ræningjarnir hirtu úr þeim sem nemur tæplega 150 þúsund krónum. Það hefur gengið á ýmsu hjá mexíkóskum fjölmiðlamönnum sem hafa verið að flytja fréttir af undirbúningi Ólympíuleikanna. Gríska lögreglan handtók fyrr í vikunni sex mexíkóska blaðamenn fyrir brot á öryggisreglum. Á miðvikudag lögðu tveir mexíkóskir blaðamenn fram kæru gegn grísku strandgæslunni og sögðu menn á hennar vegum hafa neytt sig inní ómerktan bíl, þar sem þeir voru lamdir, eftir að þeir höfðu verið að mynda við höfn þar sem strangar öryggisreglur gilda. Áætlaðar kostnaður vegna öryggisgæslu samfara Ólympíuleikunum, sem hefjast næsta fimmtudag, er níutíu milljarðar íslenskra króna.