Vilja afnema 24. ára reglu

Héraðsformenn danska Sósíaldemókrataflokksins vilja afnema eða milda svokallaða tuttugu og fjögurra ára reglu í útlendingalögum, þvert á orð flokksformannsins um að sátt sé um stefnu flokksins í innflytjendamálum. Reglan er sams konar og sú sem rædd var hér á landi þegar til umræðu var beyting á útlendingalögum á Alþingi í vor. Líkt og hér er gagnrýnin í Danmörku sú að regla sem kveður á um að erlendir makar verði að vera orðnir 24 ára til að fá dvalarleyfi sé of stíf. Í frumvarpi Björns Bjarnasonar, dómsálaráðherra, um breytingu á lögum um útlendinga, eru nánustu aðstandendur skilgreindir sem makar eldri en 24 ára, börn yngri en 18 og ættingjar eldri en 66 ára. Jyllands Posten segir óeiningu vera meðal Sósíaldemókrata þrátt fyrir að formaðurinn, Mogen Lykketoft, hafi á dögunum beðið flokksfélaga sína um að gagnrýna ekki stefnu flokksins í innflytjendamálum. Héraðsformaðurinn í Ringköbing, Sören Ole Madsen, segir í viðtal við blaðið að hann sé ekki sammála þeim rökum að tuttugu og fjögurra ára reglunni sé eingöngu ætlað að girða fyrir gervihjónabönd, líkt og rætt hefur verið um á Íslandi. Madsen segir ekki sanngjarnt að lög séu sett gegn brotum minnihluta en hafi áhrif á meirihluta fólks. Aðrir héraðsformenn eru sammála flokksformanninum um að reglan skuli standa en vilja að hún verði milduð með einhverju móti. Í skýrslu Evrópuráðsins í sumar kom fram gagnrýni á stefnu Dana í innflytjendamálum og þá sérstaklega tuttugu og fjögurra ára regluna. Þá var einnig gagnrýnd sú regla að fólk þurfi að leggja fram tryggingu sem samsvarar 600 þúsund krónum og að sýna fram á atvinnu til að sanna að viðkomandi geti framfleytt maka sínum.