Myndband með aftöku birt

Myndband af því þegar bandarískur gísl var hálshöggvinn af mannræningjum í Írak, var birt í morgun, á vefsíðu samtaka tengdum al Qaeda. Annað mynband var birt í morgun þar sem tyrkneskum bílstjóra er hótað sömu örlögum. Á myndbandinu segir ungur maður að hann heiti Benjamin Ford og sé frá San Fransisco. Hann segir að verði bandarískir hermenn ekki kallaðar frá Írak verði þeir allir aflífaðir á þennan hátt. Hendur mannsins voru bundir og hann sat á stól. Hann gaf upp nafn sitt og heimilisfang áður en hann var tekinn af lífi. Þær upplýsingar passa við Benjamin Vaterford, sem heldur úti heimasíðu á netinu. Á þeirri síðu kemur fram að hann sé 22 ára tónlistarmaður sem vinni einnig við gerð tölvuleikja. Ólíkt fyrri myndböndum frá hryðjuverkahópi Jórdanans al-Zarqawis var maðurinn ekki klæddur í appelsínugulan fangagalla og ekki sást í fána samtakanna. En á yfirlýsingu samtakanna sést merki þeirra. Á miðvikudag gaf Hvíta húsið út þá yfirlýsingu að þjóðir sem stæðu að herbandalaginu í Írak myndu ekki láta oftar undan kröfum mannræningja, í kjölfar þess að filippseysk stjórnvöld kölluðu sína menn frá landinu svo lífi vörubílstjóra frá Filippseyjum yrði þyrmt. Að minnsta kosti tuttugu gíslar eru enn í haldi mannræningja í Írak og að minnsta kosti tíu hafa verið drepnir. Önnur myndbandsupptaka var birt í morgun, þar sem hótað er að aflífa tyrkneskan bílstjóra eftir tvo sólarhringa, verði starfsfólk fyrirtækisins ekki kallað heim frá Írak. Bílstjórinn sést taugaveiklaður á myndbandinu umkringdur grímuklæddum mönnum.