Hörð átök í Najaf

Bandarískar herþyrlur skutu á sjíta múslima í íröksku borginni Najaf í dag, nokkrum klukkustundum eftir að írakski forsætisráðherrann hafði hvatt uppreisnarmenn til að leggja niður vopn. Hann fór óvænt í stutta heimsókn til borgarinnar í dag, en þar hafa geisað hörð átök í fjóra daga. Allawi, Forsætisráðherra íröksku bráðabirgðastjórnarinnar ræddi ástandið við borgarstjórann í Najaf, þegar hann fór þangað í morgun ásamt tveimur meðráðherrum sínum. Forsætisráðherrann segist ekki ætla að handtaka leiðtoga uppreisnarmanna Moqtada al-Sadr en vill engar samningaviðræður fyrr en vopn verða lögð niður. Fljótlega eftir að Allawi yfirgaf borgina brutust út átök á ný. Átökin í Najaf hafa meðal annars leitt til þess að friðsælli sjíta leiðtogi en al-Sadr, Ali al-Sistani, sem hefur meðal annars liðsinnt Sameinuðu þjóðunum, flúði til Bretlands þar sem hann er nú í rannsókn á hjartadeild sjúkrahúss í London. Írakska bráðabirgðastjórnin tilkynnti í dag að dauðarefsingar yrðu teknar upp á ný, en þær voru aflagaðar eftir fall Saddams Husseins, þeim mun eingöngu verða beitt í málum er varða morð, mannrán og eiturlyfjabrot. Mannrán halda áfram og í dag var írönskum embættismanni rænt í Írak. Arabísk sjónvarpsstöð birti mynd af manninum og vegabréfi hans í dag. Mannræningjarnir saka hann um að valda deilum milli trúarhópa í Írak. Tvær sprengjur sprungu nærri hóteli í Bagdad síðdegis og bandarísk herþyrla þurfti að nauðlenda í höfuðborginni. Skæruliðar segjst hafa skotið hana niður en Bandaríkjamenn viðurkenna það ekki.