90% féllu „eftir“ stríð

Níu af hverjum tíu föllnum hermönnum í Írak féllu eftir að George Bush Bandaríkjaforseti lýsti því yfir að meiriháttar átökum í Írak væri lokið. Ekkert lát er á árásum uppreisnarmanna í borgunum Najaf og Bagdad. Moqtada al-Sadr sjítaklerkur segist ekki ætla að gefast upp. Uppreisnarmenn ganga um með sprengjuvörpur á öxlunum og reyna að skjóta í átt að hermönnum. Fimm Bandaríkjamenn hafa látist í átökunum síðustu daga og einn Breti. Yfir níu hundruð bandarískir hermenn hafa fallið í Írak en athygli vekur að flestir þeirra, eða rúmlega átta hundruð, létust eftir að George Bush Bandaríkjaforseti lýsti því yfir að meiriháttar átökum í Írak væri lokið í maí í fyrra. Af níu hundruð hafa yfir tvö hundruð látist af slysförum. Bretar eru með mun fámennara herlið í Írak og halda mestmegnis til í borginni Basra í Suður-Írak. Þeir hafa misst sextíu og einn mann. Flestir þeirra, eða þrjátíu og átta, létust af slysförum eða fyrir mistök í árásum samherja sinna. Hátt í tuttugu þúsund Írakar hafa fallið í átökum frá því stríðið hófst árið 2003. Þar af eru sex þúsund óbreyttir borgarar. Fimmtíu og níu hermenn frá öðrum þjóðum hafa dáið í Írak og enn vekur athygli að lang flestir þeirra féllu eftir maí á síðasta ári, eða eftir að stríðið var unnið.