Víkur sér undan umbótum

Jasser Arafat, forseti Palestínu, hefur vikið sér undan því að staðfesta umbætur í stjórnkerfi landsins sem hann lofaði í síðasta mánuði að sögn palestínskra þingmanna. Loforðin gaf Arafat þegar allt var á suðupunkti í palestínskum stjórnmálum og fastar sótt að honum en áður eru dæmi um. Þingmenn sem funduðu með Arafat í gær lýstu vonbrigðum með að það eina sem hann hefði staðfest enn sem komið er væri að Ahmed Qureia, forsætisráðherra Palestínu, fengi að velja sína eigin ráðherra. Þingmennirnir sitja í nefnd sem var komið á fót í síðasta mánuði til að setja saman umbótaáætlun. Þingmennirnir hafa lagt hart að Arafat að tryggja valddreifingu, undirrita lög gegn spillingu og að heita því að endurskipuleggja öryggissveitirnar. Eftir fundinn í gær sögðu þeir að þó Arafat hefði lýst sig fylgjandi nokkrum breytingum sem þingmennirnir lögðu til hefði hann lagst gegn öðrum. Þá hefði hann sagst fylgjandi grundvallarlögum palestínska heimasvæðisins og ákvæðum þeirra um valdadreifingu en neitaði að láta af stjórn ákveðinna stofnana. Þá sagði hann ekkert ákveðið um umbætur í öryggissveitunum.