Hryðjuverkaárásir í Tyrklandi

Tveir eru látnir og sjö sárir eftir sprengjuárásir á tvö hótel og gasverksmiðju í Tyrklandi í nótt. Tvær sprengjur sprungu samtímis við hótel í ferðamannahverfi í borginni Istanbúl og kenna yfirvöld hryðjuverkamönnum um. Nafnlaus ábending barst um sprengju á öðru hótelinu tíu mínútum áður en hún sprakk. Varað var við sprengjunum við gasverksmiðjuna hálftíma áður og tveimur sprengjum var komið fyrir undir gastanki sem sprakk ekki. Engan sakaði í verksmiðjunni og tekist hefur að koma í veg fyrir gasleka sem kom upp. Samtals voru fimmtíu og sjö gestir á hótelunum tveimur þegar árásin var gerð klukkan tvö í nótt að staðartíma.