1700 vinna að niðurlögum eldanna

Grikkir, Spánverjar og Ítalir hafa sent flugvélar til Portúgals til þess að hjálpa til við að slökkva skógarelda sem geisað hafa í landinu undanfarna daga. Þó að fleiri eldar hafi komið upp í ár en í fyrra hefur tjón vegna þeirra verið mun minna. Um 1700 slökkviliðsmenn vinna nú að því að ráða niðurlögum eldanna, sem loga á átta stöðum víðs vegar um Portúgal. Þeim hefur nú borist aðstoð frá Spánverjum, Grikkjum og Ítölum, sem sent hafa þar til gerðar flugvélar á staðinn til að ráða niðurlögum eldanna. Mestir eru eldarnir í héruðunum Algarve og Faro og í fjallgarði suður af höfuðborginni Lissabon. Hitinn í Portúgal er mikill þessa dagana og eldarnir, sem staðið hafa yfir í fjóra daga, eru mun meiri en á sama tíma á síðasta ári. Þrátt fyrir að enginn hafi látist af völdum eldanna hafa þeir valdið miklum náttúruspjöllum og þrír hafa særst. Þá voru 80 manns fluttir frá heilsulind í Monchique í gær, þar sem tvö hús brunnu auk 80 hekara landsvæðis. Í fyrra létu átján manns lífið í skógareldum í Portúgal og meira land brann en nokkru sinni áður eða 424 þúsund hektarar. Ef fram heldur sem horfir er hætt við að ástandið í ár verði ekki betra. Hitinn í Portúgal hefur verið mikill undanfarna daga, en vonast er til að breyting verði á því frá og með helginni. Skógareldar hafa einnig geysað á Spáni og í Frakklandi undanfarna daga og á Spáni hafa tveir látist af völdum eldanna og fjöldi fólks hefur þurft að yfirgefa heimili sín.