Erlent

Bandaríkin og Norður-Kórea í sögulegum viðræðum

Viðræður eru hafnar á milli erindreka Bandaríkjanna og Norður-Kóreu um að koma á eðlilegum diplómatískum samskiptum á milli ríkjanna tveggja. Fyrsti fundurinn var í dag og er hann sá fyrsti í 50 ár á milli landanna tveggja.

Enn ekki samkomulag um refsiaðgerðir

Sendiherrar hjá Sameinuðu þjóðunum funduðu í dag um væntanlegar refsiaðgerðir gegn Íran en samkomulag hefur enn ekki náðst. „Málið hefur verið fært til öryggisráðsins“ sagði aðstoðarutanríkisráðherra Bandaríkjanna, Nicholas Burns, eftir fund með Ban Ki-Moon, aðalritara Sameinuðu þjóðanna.

Ætla að rannsaka möttul jarðarinnar

Vísindamenn frá háskólanum í Cardiff í Bretlandi lögðu í dag af stað í leiðangur til þess að kanna hafsbotninn á Atlantshafinu en á staðnum sem þeir ætla að skoða vantar jarðskorpuna. Möttull jarðarinnar er þar óvarður en svæðið, sem er mörg þúsund ferkílómetrar að stærð, uppgötvaðist nýlega.

Reyndu að eyðileggja sönnunargögn

Bandarískir hermenn reyndu að uppræta og eyðileggja allar myndir og myndbönd af skotárásinni sem átti sér stað í gær. Í henni létust að minnsta kosti tíu manns. Þetta kom fram á vefsíðu fréttastöðvarinnar Al Jazeera í dag.

Cheney með blóðtappa

Læknar í Bandaríkjunum fundu í dag blóðtappa í vinstri fótlegg Dick Cheneys varaforseta Bandaríkjanna. Hann fær lyf til þess að þynna blóðið en verður ekki lagður inn á spítala samkvæmt fregnum frá talsmönnum hans.

Átta fórust í flugslysi í Austurríki

Átta manns létu lífið þegar lítil eins hreyfils flugvél lenti í árekstri við þyrlu yfir skíðasvæðinu í Zell am See í Austurríki í dag. Sjö voru um borð í þyrlunni en einn í flugvélinni og komst enginn lífs af.

Ungdómshúsið rifið

Ungdómshúsið, á Norðurbrú í Kaupmannahöfn, var rifið í morgun af grímuklæddum verkamönnum sem óttuðust hefndaraðgerðir mótmælenda. Frekari mótmæli hafa verið boðuð í borginni á næstu dögum.

NATO banar níu almennum borgurum í Afganistan

Níu almennir borgarar í norðurhluta Afganistan létu lífið í loftárásum NATO í dag. NATO gerði þá árásir fyrir mistök á íbúðarhúsnæði en þeir töldu að þar hefðu verið hryðjuverkamenn á ferð.

Flestum meintum hryðjuverkamönnum sleppt

Meirihluti þeirra sem hafa verið handteknir samkvæmt hryðjuverkalögum, í Bretlandi, síðan árásin var gerð á bandaríkin 11. september 2001, hefur verið látinn laus án ákæru. Samkvæmt tölum frá innanríkisráðuneytinu, sem birtar voru í dag, voru 1.126 handteknir frá árásinni til loka síðasta árs. Fjörutíu til viðbótar sátu í varðhaldi vegna aðgerða lögreglu gegn hryðjuverkum. Af þessum var 652 sleppt án ákæru.

Megrunarpilla gefin frjáls

Megrunarlyfið Alli hefur verið leyst undan lyfseðilsskyldu í Bandaríkjunum, og verður í sumar hægt að fá það í hvaða verslun sem er. Það var Bandaríska lyfjastofnunin sem ákvað að gefa lyfið frjálst. Lyfið nýtur mikilla vinsælda þar vestra.

Frakkar senda liðsauka til Mið-Afríku

Frakkar hafa sent liðsauka frá Gabon til Mið-Afríku lýðveldisins, eftir að hermenn þeirra þar lentu í átökum við uppreisnarmenn um helgina. Um eitthundrað hermenn voru sendir úr liði sem Frakkar hafa í Gabon. Uppreisnarmennirnir vilja steypa Francois Bozize, forseta af stóli.

Danir vilja grafa 9000 km af raflínum í jörðu

Mikil samstaða er um það hjá stjórnmálaflokkum í Danmörku að grafa 9000 kílómetra af raflínum í jörðu, aðallega til þess að losna við risastór möstur og línur sem eru lýti á umhverfinu. Að sögn Jótlandspóstsins er meirihluti fyrir því á þingi að grafa línurnar.

Skordýraeitur ógnar regnskógum Kosta Ríka

Skordýraeitur ógnar nú mjög vernduðum regnskógum í Kosta Ríka, jafnvel þó að því sé dreift í margra kílómetra fjarlægð frá skógarjaðrinum. Þetta er vegna þess að eitrið leysist upp í rigningarvatni, gufar upp og fellur svo strax aftur sem regn í skógunum. Þetta kemur fram í tímaritinu Enviromental Science & Technology. Meðal afleiðinga þessa er að froskar og skriðdýrategundir í útrýmingarhættu drepast úr eitrinu.

Rauðglóandi Visakort

Sænskri móður brá í brún þegar hún fékk Visa reikninginn sinn þar sem fram kom að hún hefði keypt fyrir rífar 260 þúsund krónur í vefversluninni Playahead. Það kom enda á daginn að það var þrettán ára dóttir hennar sem hafði gerst svona umsvifamikil í viðskiptum og keypt bæði fyrir sjálfa sig og fjörutíu félaga sína.

Ekkert bendir til þess að Díana hafi verið myrt

Dæmdir fyrir pyntingar á Serbum

Hæstiréttur Króatíu hefur staðfest fangelsisdóma yfir átta fyrrverandi herlögreglumönnum fyrir að pynta og myrða serbneska fanga í stríðinu árið 1992. Fórnarlömb þeirra voru bæði serbneskir hermenn og almennir borgarar. Mennirnir fengu sex til átta ára fangelsisdóma.

Skattmann stekkur á Alexöndru

Þegar Alexandra prinsessa sagði já við kærastann sinn klukkan fjögur á föstudag, urðu umtalsverðar breytingar á hennar högum. Hún er nú ekki lengur prinsessa heldur aðeins greifynja, og danski skattmann mun hér eftir hirða drjúgan skerf af tekjum hennar.

Átta fórust í árekstri flugvéla við skíðastað í Austurríki

Átta manns fórust þegar þyrla og lítil einkaflugvél rákust saman í Austurríki, í dag. Slysið varð á skíðastaðnum Zell am See. Sjö manns voru um borð í þyrlunni, sem var að flytja tækjabúnað að nálægri orkuveitu.

Einstakar myndir af Satúrnusi

Geimfarið Cassini hefur sent til jarðar einstakar myndir af hringum Satúrnusar. Myndirnar eru teknar í um milljón kílómetra fjarlægð. Á myndunum má meðal annars sjá fylgitunglin Dione og Enceladus, sem hanga eins og örlitlir hvítir dílar út við sjóndeildarhringinn. Enceladus

Kæfa mótmæli í fæðingu

Nokkur ungmenni hafa verið handtekin nærri Ungdomshuset í morgun við það að reyna að stöðva niðurrif hússins. Einhverjir lögðust fyrir flutningabíla sem fjarlægja steypubrot frá húsinu. Jagtvej, gatan sem Ungdomshuset stendur við er lokuð og hefur lögregla það að markmiði að kæfa öll mótmæli í fæðingu.

Ung sænsk kona fær Bókmenntaverðlaun Norðurlandaráðs

Sænski rithöfundurinn Sara Stridsberg hlýtur Bókmenntaverðlaun Norðurlandaráðs í ár. Sara, sem er 33 ára, fær verðlaunin fyrir skáldsöguna Draumadeildina, sem var gefin út í fyrra. Soffía Auður Birgisdóttir, formaður dómnefndar bókmenntaverðlaunanna tilkynnti niðurstöðuna í Norræna húsinu í morgun.

Al-Kaída hótar að myrða Harry

Hryðjuverkasamtökin Al-Kaída hafa hótað því að ræna Harry bretaprins, þegar hann verður sendur til Íraks, í maí næstkomandi, að sögn breska blaðsins The Sun. Blaðið segir að hótunin hafi komið fram á vefsíðu sem róttækir múslimar halda úti. "Múslimar í Írak munu drepa Harry prins, megi Allah gefa honum það sem hann á skilið," segir meðal annars á vefsíðunni.

ESB setur bann á flugfélög

Niðurrifið hafið á ný

Niðurrif Ungdomshuset er hafið á nýjan leik eftir að vatni var dælt á steypuryk sem þyrlast hafði upp þegar niðurrifið hófst í morgun. Það var umhverfisráð Kaupmannahafnar sem stöðvaði framkvæmdirnar um hálf tíu vegna þess hve mikið steypuryk lagði yfir hverfið og þá óttast menn að það sé asbest í steypunni. Þess verður hér eftir gætt að ryk þyrlist sem minnst upp og reynt að binda það með vatni sem dælt er yfir allt. Asbest getur verið hættulegt sé því andað inn.

Vilja minnka útblástur

Utanríkisráðherrar 27 ríkja Evrópusambandsins funda nú í Brussel um leiðir til að minnka útblástur koltvísýrings í andrúmsloftið. Ekki hefur enn verið komist að samkomulagi en það strandar á skiptum skoðunum um smáatriði. Markmið fundarins er að ráðherrarnir samþykki metnaðarfulla áætlun sem er ætlað að draga verulega úr útblæstri. Ekki er þó búist við því að samkomulag náist um eitt helsta mál fundarins, hvort eigi að setja bindandi ákvæði um nýtingu endurnýjanlegra orkugjafa. Frank-Walter Steinmeier utanríkisráðherra Þýskalands sagðist þó bjartsýnn um að það þokist í samkomulagsátt á fundinum.

Stöðva niðurrif af ótta við asbestmengun

Skipulagsyfirvöld í Kaupmannahöfn hafa stöðvað niðurrif Ungdomshuset vegna þess hversu mikið steypuryk hefur þyrlast upp og yfir hverfið við það. Óttast er að rykið innihaldi asbest sem getur valdið miklum skaða sé því andað inn. Norðurbrú er með þéttbýlustu hverfum Kaupmannahafnar. Nú á að reyna að bleyta upp í rykinu til að það setjist og rýma stærra svæði umhverfis húsið til að enginn hljóti skaða af. Verktakar fá ekki leyfi til að halda niðurrifinu áfram fyrr en komist hefur verið fyrir drefingu ryksins.

Árás myndi flýta kjarnavopnavæðingu Íran

Árás á Íran gæti haft í för með sér að landið komi sér upp kjarnorkuvopnum hraðar en annars. Þetta er fullyrt í nýrri skýrslu frá rannsóknarhópi við háskólann í Oxford á Englandi sem vopnasérfræðingurinn Frank Barnaby leiðir.

Chavez óttast um líf sitt

Hugo Chavez forseti Venesúela óttast nú mjög um líf sitt og segir að CIA, bandaríska leyniþjónustan hafi lagt á ráðin með að myrða sig á laun. Chavez hefur stóraukið öryggisgæslu í kringum sig. Hann segir John Negroponte, sem áður var yfirmaður CIA og er nú aðstoðarutanríkisráðherra Condoleezu Rice vera atvinnumorðingja sem ekki muni una sér hvíldar fyrr en hann hafi ráðið sig af dögum.

Niðurrif Ungdomshuset hafið

Risastór silfurgrár krani er nú í óðaönn við að rífa niður Ungdomshuset en niðurrifið hófst klukkan sjö í morgun. Fyrrum notendur hússins hafa margir hverjir safnast saman nærri húsinu og eru ýmist reiðir eða sorgmæddir yfir örlögum þess. Enn er þó allt með rólegasta móti þó löregla óttist að mótmælendur sýni reiði sína í verki. Vörubílar sem flytja í burtu steypubrotin úr húsinu fá lögreglufylgd þegar þeir keyra í burt af staðnum.

Útgjöld aukin til varnarmála

Wen Jiabao forsætisráðherra Kína tilkynnti í dag að Kínverjar ætli að verja 18 prósent hærri fjárhæð til varnarmála þetta árið en á síðasta ári þegar hann setti kínverska þingið. Þá lofaði Jiabao einnig auknum stuðningi við mennta- og heilbrigðiskerfi. Talið er að varnarmálaútgjöldin aukist svo mjög vegna þess að Bandaríkjamenn hafa samið við útlagastjórnina á Tævan, erkióvini kínverskra stjórnvalda, um að selja þeim 450 flugskeyti á þessu ári.