Hetjuleg frammi­staða Hauks dugði ekki til sigurs

Haukur skoraði 11 mörk úr 14 skotum og gaf að auki 8 stoðsendingar. Hann reyndi allt sem hann gat til að koma RN Löwen inn í leikinn en liðsfélagarnir fylgdu ekki með.

Eftir að hafa tekið út tveggja mínútna brottvísun um miðjan seinni hálfleik lagði Haukur upp tvö mörk fyrir RN Löwen og skoraði síðan sjálfur síðustu fjögur mörkin, en tókst ekki að minnka muninn nægilega mikið.

Göppingen fagnaði því tveggja marka sigri eftir að hafa leitt með fimm mörkum skömmu fyrir leikslok.

Liðin sitja í 8. og 9. sæti deildarinnar en Göppingen er þremur stigum frá RN Löwen eftir úrslit dagsins. Bæði sigla þau lygnan sjó og hvorugt á séns á Evrópusæti í síðustu fimm leikjunum.

Haukur hefur verið stórkostlegur á sínu fyrsta tímabili í þýsku úrvalsdeildinni. Hann er næstmarkahæstur hjá RN Löwen en lang stoðsendingahæstur í þýsku úrvalsdeildinni.

Þótt ótrúlegt megi hljóma var þetta í fimmta sinn á tímabilinu sem hann skorar meira en tíu mörk og leggur upp meira en fimm mörk í einum leik.