Hefur áhyggjur af fuglaflensu - ekki United

Jose Mourinho segist hafa meiri áhyggjur af fuglaflensufaraldri en áhlaupi Manchester United í ensku úrvalsdeildinni. United hefur unnið átta leiki í röð og hefur forskot Chelsea á toppnum minnkað hratt að undanförnu.

Ferguson og Rooney menn mánaðarins

Sir Alex Ferguson hjá Manchester United var í dag kjörinn knattspyrnustjóri mánaðarins í ensku úrvalsdeildinni og framherji hans Wayne Rooney var á sama tíma kjörinn leikmaður mánaðarins í mars. Manchester United vann alla fimm leiki sína í deildinni í mánuðinum. Þetta er í þriðja sinn sem Wayne Rooney fær þessi verðlaun, en í sextánda skipti sem Ferguson fær þau - sem er met.

Auglýsa fyrir netfyrirtæki

Úrvalsdeildarfélagið Aston Villa hefur nú líkt og Manchester United gengið frá nýjum tveggja ára auglýsingasamningi við nýjan styrktaraðila. Ekki fæst upp gefið hversu hár samningurinn er, en hann er við netfyrirtæki sem ber nafnið 32red og munu búningar liðsins bera merki fyrirtækisins frá og með næsta tímabili.

Fær landsliðssætið ef hann kemst í lið Arsenal

Sol Campell segir að Sven-Göran Eriksson hafi lofað sér og Ashley Cole sæti í enska landsliðinu svo framarlega sem þeir nái að festa sig í sessi í byrjunarliði Arsenal áður en leiktíðinni á Englandi lýkur.

United á ekki möguleika á að ná okkur

Varnarmaðurinn Ricardo Carvalho hjá Chelsea segir að Manchester United eigi ekki fræðilegan möguleika á að ná liði sínu að stigum í baráttunni um enska meistaratitilinn í vor, þó Manchester-liðið hafi verið á mikilli sigurgöngu undanfarið.

Eriksson hentar Real Madrid vel

Danski harðjaxlinn Thomas Gravesen segir að Sven-Göran Eriksson væri kjörinn í að taka við stjórn Real Madrid þegar hann lætur af störfum sem landsliðsþjálfari Englendinga eftir HM í sumar. Forráðamenn Real Madrid eru nú að leita sér að góðum knattspyrnustjóra og er nafn Eriksson eitt þeirra sem oftast hefur verið nefnt til sögunnar að undanförnu.

Atli og Ormur frá Dallandi sigruðu Gæðingafimina

Atli Guðmundsson og Ormur frá Dallandi sigruðu í gæðingafimi Meistaradeildar VÍS sem haldin var í gærkveldi í Ölfushöll á Ingólfshvoli. Það er greinilega að þessi keppni er komin til að vera og eigum við til knapa og hross á heimsmælikvarða hvað gæðingafimi varðar.

Enn sigrar New Jersey

Lið New Jersey Nets vann í nótt sinn 14. sigur í röð í NBA deildinni þegar liðið skellti Charlotte Bobcats 113-102 á heimavelli sínum. Detroit Pistons lagði Miami á útivelli 95-82 og Carmelo Anthony tryggði Denver 110-108 sigur á LA Lakers með skoti á síðustu sekúndum framlengingar.

Skallagrímur í úrslit

Skallagrímur er kominn í úrslit Iceland Express-deild karla í körfubolta eftir frækinn sigur á Keflvíkingum í oddaleik í Keflavík í kvöld 84-80. Þetta er sannarlega sögulegur sigur fyrir Val Ingimundarson þjálfara Skallagríms, sem bar þarna sigurorð af yngri bróður sínum Sigurði Ingimundarsyni, þjálfara Keflavíkur. Leikurinn var æsispennandi í lokin, en Keflvíkingar gerðu dýr mistök á lokasprettinum og voru í raun langt frá sínu besta þegar allt var undir í oddaleiknum í kvöld.

Þetta var sögulegur sigur

Steve McClaren, stjóri Middlesbrough var skiljanlega í skýjunum eftir sigur sinna manna á Basel í Evrópukeppni félagsliða í kvöld, en Boro tókst að komast áfram í undanúrslit keppninnar þrátt fyrir að lenda þremur mörkum undir í einvíginu. Massimo Maccarone skoraði sigurmark Boro á 90. mínútu og enska liðið vann samanlagt 4-3.

Ævintýralegur sigur Middlesbrough

Middlesbrough komst í kvöld í undanúrslitin í Evrópukeppni félagsliða þegar liðið lagði svissneska liðið Basel 4-1 á heimavelli sínum og fer því áfram samtals 4-3. Gestirnir komust yfir í upphafi leiks og því virtust vonir Boro um að komast áfram vera að engu orðnar. Mark Viduka skoraði tvö mörk fyrir Boro, Jimmy Floyd Hasselbaink eitt og það var svo Massimo Maccarone sem skoraði sigurmark Boro í uppbótartíma. Basel lék manni færra frá 73. mínútu.

Valur lagði Selfoss

Einn leikur fór fram í DHL-deild karla í handbolta í kvöld. Valur lagði Selfoss 26-21 í Laugardalshöll. Valur er því sem fyrr í þriðja sæti deildarinnar og hefur hlotið 34 stig, en Selfyssingar eru á botninum með aðeins átta stig.

Rafmögnuð spenna í Keflavík

Staðan í leik Keflavíkur og Skallagríms að loknum þriðja leikhluta er 61-60 fyrir gestina úr Borgarnesi, en heimamenn hafa heldur betur spýtt í lófana í síðari hálfleik eftir að hafa verið 14 stigum undir í hálfleik. Þær verða því væntanlega æsilegar síðustu tíu mínúturnar í leiknum, þar sem ræðst hvort liðið mætir Njarðvíkingum í úrslitum.

Singh í forystu

Fiji-búinn Vijay Singh hefur forystu á Masters-mótinu í golfi þegar fyrstu umferðinni er að verða lokið. Singh er á fimm höggum undir pari eða 67 höggum, en Bandaríkjamaðurinn Rocco Mediate kemur þar skammt á eftir á 68 höggum. Tiger Woods hefur verið nokkuð óstöðugur á fyrsta hringnum og er að leika á 72 höggum. Sýnt verður beint frá mótinu á sjónvarpsstöðinni Sýn um helgina.

Jafnt á Riverside í hálfleik

Staðan í leik Middlesbrough og Basel í 8-liða úrslitum Evrópukeppni félagsliða er 1-1 þegar flautað hefur verið til leikhlés. Gestirnir komust yfir í upphafi leiks, en það var svo ástralski framherjinn Mark Viduka sem jafnaði fyrir heimamenn sem enn eiga langt í land ef þeir ætla sér áfram í keppninni. Þá er staðan í leik Schalke og Levski Sofia jöfn 1-1 þegar skammt er til leiksloka og þýska liðið því komið með annan fótinn áfram í undanúrslitin eftir öruggan sigur í fyrri leiknum.

Tap fyrir Hollandi

Íslenska kvennalandsliðið í handbolta tapaði öðrum leik sínum í röð í kvöld á æfingamóti sem fram fer í Tékklandi þessa dagana. Liðið tapaði í kvöld fyrir sterku liði Hollendinga 24-22. Anna Úrsúla Guðmundsdóttir, Hrafnhildur Skúladóttir og Jóna Margrét Ragnarsdóttir skoruðu fjögur mörk hver fyrir íslenska liðið sem mætir Tyrkjum á morgun.

Skallagrímur leiðir í hálfleik

Skallagrímur hefur nokkuð óvænta forystu í Keflavík í oddaleik liðanna í undanúrslitum Iceland Express-deildar karla í körfubolta. Staðan í hálfleik er 42-28 gestunum í vil, en heimamenn hafa verið langt frá sínu besta það sem af er leiks. AJ Moye hefur skorað 12 stig fyrir Keflavík, en Hafþór Gunnarsson er kominn með 14 stig hjá Skallagrími - öll í fyrsta leikhlutanum og Pétur Guðmundsson hefur skorað 9 stig. Þá er George Byrd búinn að hirða 15 fráköst. Leikurinn er í beinni útsendingu á Sýn.

Steua Búkarest áfram

Steua Búkarest er komið áfram í undanúrslitin í UEFA-bikarnum í knattspyrnu eftir markalaust jafntefli við granna sína í Rapid Búkarest í dag. Steua fer því áfram á marki skoruðu á útivelli, en hvort lið skoraði aðeins eitt mark í einvíginu. Þá eru vonir Middlesbrough um að komast áfram í keppninni orðnar ansi litlar, því liðið er undir á heimavelli sínum gegn Basel frá Sviss og þarf því að skora fjögur mörk til að komast áfram í keppninni.

Martröðin heldur áfram

Meiðslamartröð enska varnarmannsins Jonathan Woodgate virðist hvergi nærri á enda og nú hefur þjálfari Real Madrid gefið það út að hann sé svartsýnn á að fyrrum landsliðsmaðurinn nái að koma til baka á þessari leiktíð vegna meiðsla sinna á læri. Þetta þýðir að draumur Woodgate um að komast í enska landsliðshópinn fyrir HM er að öllum líkindum úr sögunni.

Sevilla í undanúrslitin

Spænska liðið Sevilla varð nú síðdegis fyrsta liðið til að tryggja sér sæti í undanúrslitum Evrópukeppni félagsliða þegar liðið gerði 1-1 jafntefli við rússneska liðið Zenit frá St. Pétursborg og er því komið áfram samtals 5-2.

Við förum í úrslitaleikinn

Hinn ungi Cesc Fabregas hjá Arsenal segist þess viss að liðið muni fara alla leið í úrslitaleikinn í Meistaradeildinni, en Arsenal mætir löndum hans í Villareal frá Spáni í undanúrslitinum. Fabregas hefur farið á kostum með Arsenal í Meistaradeildinni en vill ekki vera borinn saman við Patrick Vieira, fyrrum leikmann liðsins.

Ekki á leið til Villareal

Franski miðjumaðurinn Robert Pires hjá Arsenal hefur alfarið neitað sögusögnum um að hann sé búinn að skrifa undir samning við spænska liðið Villareal, sem einmitt mætir Arsenal í undanúrslitum Meistaradeildarinnar. Pires hefur enn ekki náð samkomulagi við Arsenal um framlengingu á samningi sínum.

Tekst Boro að vinna upp forskot Basel

Enska úrvalsdeildarliðið Middlesbrough fær það erfiða verkefni í kvöld að vinna upp tveggja marka forskot svissneska liðsis Basel úr fyrri leik liðanna í 8-liða úrslitum Evrópukeppni félagsliða. Steve McClaren er bjartsýnn á að Boro nái að stríða andstæðingum sínum á heimavelli, enda sé pressan öll á gestunum.

United nær okkur ekki

Eiður Smári Guðjohnsen hefur engar áhyggjur af þeirri ógn sem Englandsmeisturum Chelsea stafar af Manchester United í úrvalsdeildinni um þessar mundir, en sigurganga Manchester undanfarið hefur þýtt að bilið milli liðanna hefur minnkað mikið.

Stóri-Sam sektaður

Sam Allardyce, knattspyrnustjóri Bolton Wanderers, hefur verið sektaður um 2000 pund og ávítaður harðlega af enska knattspyrnusambandinu fyrir ummæli sín í garð Mike Riley dómara eftir leik við Blackburn um miðjan janúar. Riley rak Hidetoshi Nakata af velli með rautt spjald í leiknum og Allardyce fór ekki leynt með skoðanir sínar á dómaranum eftir leikinn. Hann ætlar þó ekki að áfrýja dómi sambandsins.

Reynsluleysi Arsenal segir til sín í undanúrslitunum

Varnarmaðurinnn Rodolfo Arruabarrena hjá Villareal sem skoraði sigurmark liðsins gegn Inter í vikunni, segir að þó Arsenal sé vissulega með hörkulið, muni reynsluleysi ungra leikmanna þess koma til með að segja til sín þegar pressan eykst í undanúrslitum Meistaradeildarinnar.

Chicago upp fyrir Philadelphia

Lið Chicago Bulls vann í nótt afar mikilvægan sigur á Philadelphia 76ers 99-92 í NBA deildinni og höfðu liðin því sætaskipti í Austurdeildinni. Chicago hefur verið á góðu róli undanfarið á meðan illa hefur gengið hjá Philadelphia og nú er útlit fyrir að Chicago nái inn í úrslitakeppnina. Allen Iverson skoraði 26 stig fyrir Philadelphia, en Andres Nocioni og Ben Gordon skoruðu 21 stig hvor fyrir Chicago.

Landar 56 milljón punda samningi við AIG

Manchester United hefur undirritað auglýsingasamning við tryggingafélagið AIG (American International Group) og mun félagið bera auglýsingu fyrirtækisins á treyjum sínum á næsta tímabili. Samningurinn hljóðar upp á 56,5 milljónir punda fyrir næstu fjögur ár.

Gummersbach lagði Lubbecke

Fjórir leikir voru á dagskrá í þýsku úrvalsdeildinni í handbolta í kvöld. Íslendingalið Gummersbach lagði Lubbecke 27-21. Guðjón Valur Sigurðsson og Róbert Gunnarsson skoruðu 5 mörk hvor fyrir heimamenn, en Þórir Ólafsson komst ekki á blað hjá Lubbecke.

Celtic skoskur meistari

Glasgow Celtic tryggði sér í kvöld skoska meistaratitilinn þegar liðið lagði Hearts frá Edinborg 1-0. Afmælisbarnið John Hartson hélt upp á daginn með því að skora eina mark leiksins eftir aðeins þrjár mínútur og því hafa lærisveinar Gordon Strachan endurheimt meistaratitilinn þó enn séu sex umferðir eftir af deildarkeppninni.

Arsenal áfram

Arsenal er komið í undanúrslit Meistaradeildar Evrópu eftir markalaust jafntefli við Juventus í Tórínó í kvöld. Arsenal vann fyrri leikinn 2-0 á heimavelli sínum og hélt vel aftur af ítalska liðinu í kvöld. Pavel Nedved fékk að líta rauða spjaldið hjá Juventus undir lokin, en heimamenn virkuðu frekar daufir í leiknum og virtust lítinn áhuga hafa á því að komast áfram í keppninni. Arsenal mætir spænska liðinu Villareal í undanúrslitunum.

Barcelona í undanúrslit

Barcelona er komið í undanúrslit Meistaradeildar Evrópu eftir 2-0 sigur á portúgalska liðinu Benfica á heimavelli sínum Nývangi í kvöld. Ronaldinho kom heimamönnum yfir í fyrri hálfleik og það var svo Samuel Eto´o sem tryggði Barcelona sigurinn með marki úr skyndisókn skömmu fyrir leikslok. Barcelona mætir AC Milan í undanúrslitunum.

Stoudemire úr leik

Framherjinn Amare Stoudemire spilar ekki meira með liði Phoenix Suns í vetur eftir að í ljós kom að hann þarf að fara í enn einn hnéuppskurðinn. Í þetta sinn er það þó hægra hnéð og uppskurðurinn minniháttar, en þetta þýðir engu að síður að hann getur ekki spilað með liði sínu í úrslitakeppninni eins og bjartsýnustu menn í herbúðum Phoenix höfðu vonast eftir. Þetta eru skelfileg tíðindi fyrir hinn gríðarlega efnilega Stoudemire, sem nú þarf að bíða fram á næsta haust með að sýna listir sínar á ný í NBA.

Barcelona leiðir í hálfleik

Nú er kominn hálfleikur í leikjunum tveimur sem standa yfir í Meistaradeild Evrópu. Barcelona hefur enn forystu gegn Benfica 1-0 með marki Ronaldinho, en markalaust er í Tórínó í leik Juventus og Arsenal. Leikirnir eru í beinni útsendingu á Sýn og Sýn Extra.

Barcelona komið yfir

Barcelona er komið yfir gegn Benfica á heimavelli sínum í síðari leik liðanna í Meistaradeild Evrópu. Það var brasilíski snillingurinn Ronaldinho sem skoraði mark Barca á 19. mínútu eftir frábæran undirbúning Samuel Eto´o , en hann misnotaði vítaspyrnu í upphafi leiks.

Þetta var töfrum líkast

Framherjinn Filippo Inzaghi hjá AC Milan segir að sigurinn á Lyon í Meistaradeildinni í gærkvöldi hafi verið töfrum líkastur fyrir sig, en líklega hefur enginn fagnað eins mikið og Inzaghi í gær. Hann skoraði tvö marka Milan í leiknum og markaði þar með endanlega endurkomu sína eftir að hafa barist við erfið meiðsli í tvö ár.

United mun setja mikla pressu á Chelsea

David Beckham, leikmaður Real Madrid og fyrrum leikmaður Manchester United, segir að fyrrum félagar sínir í United muni setja mikla pressu á Chelsea á lokasprettinum í ensku úrvalsdeildinni í vor.

Toyota rekur tæknistjórann

Lið Toyota í Formúlu 1 rak í dag tæknistjóra sinn Mike Gascoyne úr starfi eftir að árangur hans þótti ekki viðeigandi, en eins hafa borist fréttir af stormasömu samstarfi hans við forráðamenn liðsins. Gascoyne var áður hjá liðum Jordan og Renault.

Örn setti Íslandsmet

Sundkappinn Örn Arnarson úr SH setti Íslandsmet í 100 metra flugsundi í nótt á HM í sundi sem fram fer í Kína um þessar mundir, en keppt er í 25 metra laug. Örn synti 100 metrana á 53,17 sekúndum og bætti eigið Íslandsmet um 38/100 úr sekúndu. Tímanum náði hann í undanrásum, en það nægði honum þó ekki til að komast í undanúrslitin.

Federer er í algjörum sérflokki

Fyrrum tennisstjarnan Pete Sampras segist ekki sjá að nokkur tennisleikari í heiminum eigi möguleika á að velta Roger Federer af stalli á næstunni. Federer hefur verið einráður á toppnum síðan Sampras lagði spaðann á hilluna fyrir fjórum árum. "Ég sé engann þarna úti með vopn til að slá honum við og þeir geta ekki annað en reynt að verjast honum, hann stýrir öllum leikjum sem hann tekur þátt í," sagði Sampras.

Verðum að vera óhræddir í Tórínó

Arsene Wenger segist hafa brýnt fyrir sínum mönnum að vera óhræddir við að spila sinn leik í Tórínó í kvöld þegar liðið sækir Juventus heim í síðari leik liðanna í 8-liða úrslitum Meistaradeildar Evrópu. Arsenal vann fyrri leikinn 2-0 og er því í lykilstöðu til að komast í undanúrslitin.

Kvennalandsliðið tapaði fyrir Slóvökum

Íslenska kvennalandsliðið í handbolta tapaði 25-21 fyrir Slóvökum í fyrsta leik sínum á æfingamóti sem fram fer í Tékklandi næstu daga. Auk þess leika Hollendingar og Tyrkir á mótinu, en íslenska liðið mætir Hollendingum á morgun.

Ákvörðun liggur fyrir á næstu tveimur vikum

Umboðsmaður franska miðjumannsins Robert Pires hjá Arsenal segir að það komi væntanlega í ljós á næstu tveimur vikum hvort leikmaðurinn verði áfram í London, en hann er með lausa samninga í sumar. Pires vill vera áfram hjá Arsenal, en heimtar tveggja ára samning á meðan Arsenal býður aðeins eins árs samning fyrir leikmenn á hans aldri.

Nýr samningur í sjónmáli fyrir Andy Cole

Sóknarmaðurinn Andy Cole segir að styttist óðum í að hann undirriti framlengingu á samningi sínum við félagið. Cole er 34 ára gamall og mun ekki leika meira með liði City á þessu tímabili vegna hnéuppskurðar sem hann fór í á dögunum.

Samningurinn var aldrei einhliða

David Gill segir að Manchester United hafi aldrei samþykkt að ræða einvörðungu við netfyrirtækið Mansion um styrktarsamning með auglýsingum á treyjum félagsins. Forráðamenn Mansion slitu viðræðunum á dögunum þegar í ljós kom að United hafði átt í viðræðum við fleiri styrktaraðila, en Gill segir alltaf hafa legið fyrir að United leitaði til fleiri en eins aðila með það fyrir augum að fá sem bestan samning.