United nær okkur ekki

Eiður Smári Guðjohnsen hefur engar áhyggjur af þeirri ógn sem Englandsmeisturum Chelsea stafar af Manchester United í úrvalsdeildinni um þessar mundir, en sigurganga Manchester undanfarið hefur þýtt að bilið milli liðanna hefur minnkað mikið.

"Jose Mourinho kom með sigurhefðina til Chelsea þegar hann tók við liðinu og fékk menn til að trúa á það sem þeir eru að gera. Við erum með nóg af hæfileikaríkum mönnum í liðinu til að halda okkar striki í deildinni, við eigum eftir heimaleik við United og erum því í mikið sterkari stöðu á lokasprettinum. Við erum auk þess allir ákveðnir í að halda áfram að vinna bikara," sagði Eiður Smári í samtali við The Mirror.