Shearer vill ekki taka við af Souness

Framherjinn Alan Shearer hjá Newcastle, sem nú gegnir stöðu aðstoðarstjóra hjá félaginu tímabundið, segir að hann hafi ekki áhuga á að verða næsti knattspyrnustjóri Newcastle.

Miami burstaði Cleveland

Tveir leikir fóru fram í NBA deildinni í körfubolta í nótt. Miami vann auðveldan sigur á Cleveland 101-73. Dwayne Wade skoraði 24 stig fyrir Miami og Shaquille O´Neal skoraði 21, en LeBron James skoraði 29 stig fyrir Cleveland sem skoraði aðeins 9 stig í fjórða leikhlutanum.

Dómararnir jörðuðu okkur

Viggó Sigurðsson, landsliðsþjálfari var hundfúll eftir tapið gegn Norðmönnum í lokaleik íslenska liðsins í milliriðli á EM í Sviss í kvöld. Viggó sagði að vissulega hefði þreytan verið farin að segja til sín hjá sínum mönnum vegna þeirra skarða sem höggvin hafa verið í hópinn, en vandaði dómurum leiksins ekki kveðjurnar.

Tap fyrir Norðmönnum

Íslenska landsliðið brotlenti í síðari hálfleik gegn Norðmönnum í kvöld og tapaði 36-32 og því er sæti í undanúrslitum mótsins úr sögunni. Ef úrslit í leik Dana og Rússa í kvöld verða okkur í hag, er þó enn möguleiki á að liðið spili leik um fimmta sætið. Ólafur Stefánsson var markahæstur með 9 mörk, Guðjón Valur Sigurðsson 6 og Róbert Gunnarsson og Snorri Steinn 5.

Danir lögðu Rússa og mæta Spánverjum

Danir tryggðu sér sæti í undanúrslitunum á EM í Sviss í kvöld þegar liðið lagði Rússa sannfærandi 35-28. Danska liðið mætir því Spánverjum í undanúrslitum mótsins og í hinum undanúrslitaleiknum eigast við Frakkar og Króatar. Þjóðverjar og Rússar keppa um 5. sætið, en íslenska liðið hafnaði í 7. sæti á mótinu.

Jafnt í hálfleik hjá Rússum og Dönum

Staðan í leik Dana og Rússa er jöfn 13-13 í hálfleik, en þetta er lokaleikurinn í milliriðli okkar Íslendinga. Íslenska liðið þarf að treysta á að Rússar vinni leikinn með 4-5 mörkum til að eiga möguleika á að fá að spila um fimmta sætið í keppninni.

Gæti fengið tvöfalt bann

Framherjinn skapmikli hjá Everton, Duncan Ferguson, gæti nú átt yfir höfði sér lengra bann en það sem hann fær fyrir rauða spjaldið sem hann fékk að líta í leik Everton og Wigan á þriðjdagskvöldið.

Frakkar í undanúrslitin

Frakkar tryggðu sér í kvöld farseðilinn í undanúrslitin á EM í Sviss með öruggum sigri á Úkraínu 30-20 og lyftu sér í efsta sæti riðlis síns. Spánverjar geta endurheimt efsta sætið með sigri á Slóvenum í kvöld, en leikur liðanna er ný hafinn.

Campbell út úr hópnum

Varnarmaðurinn Sol Campbell verður ekki í leikmannahópi Arsenal þegar liðið mætir Birmingham um helgina og segir Arsene Wenger, stjóri liðsins, að hann sé ekki í andlegu ástandi til þess. Campbell æfði ekki með Arsenal í dag, eftir að hafa verið skipt útaf fyrir slaka frammistöðu með liðinu í gærkvöldi.

Ísland yfir gegn Norðmönnum

Íslendingar hafa forystu 16-14 í hálfleik gegn Norðmönnum í lokaleik sínum í milliriðli á EM í Sviss. Ólafur Stefánsson hefur skorað 4 mörk fyrir íslenska liðið, Róbert Gunnarsson 3, og þeir Guðjón Valur, Snorri Steinn og Ásgeir Örn 2 hver. Kjetil Strand hefur farið á kostum hjá norska liðinu og er kominn með 9 mörk í hálfleiknum.

Óhress með gamla stjórann sinn

Mark Hughes segist óhress með ummæli fyrrum knattspyrnustjóra síns hjá Manchester United eftir leik liðanna í gær, en Sir Alex Ferguson fór þar mikinn í að gagnrýna grófan leik Blackburn.

Króatar í undanúrslit

Króatar tryggðu sér sæti í undanúrslitum EM í Sviss í dag þegar liðið lagði Serba og Svartfellinga 34-30. Góður lokakafli tryggði Króötum sigurinn í dag eftir að jafnræði hafði verið með liðunum framan af og því er spennan í milliriðli okkar Íslendinga mikil fyrir leikinn gegn Norðmönnum í dag.

Shearer er rétti maðurinn fyrir Newcastle

Gamla kempan Chris Waddle vill meina að Alan Shearer sé einmitt maðurinn til að koma á jafnvægi í herbúðum Newcastle eftir að Graeme Souness var rekinn í dag, en Shearer hefur verið skipaður aðstoðarmaður Glenn Roader sem mun taka við liðinu tímabundið.

Sol Campbell í vandræðum

Varnarmaðurinn Sol Campbell hjá Arsenal á ekki sjö dagana sæla um þessar mundir og í gærkvöld yfirgaf hann völlinn þegar honum var skipt útaf í hálfleik fyrir að eiga sök á tveimur mörkum West Ham í hálfleiknum. Arsenal tapaði leiknum á heimavelli sínum og menn rekja það mikið til þess að Campbell sé hreinlega ekki í formi.

Souness rekinn frá Newcastle

Úrvalsdeildarfélagið Newcastle rak í dag knattspyrnustjóra sinn Graeme Souness úr starfi og hefur Glenn Roeder verið skipaður eftirmaður hans tímabundið og Alan Shearer mun verða honum til aðstoðar. Lið Newcastle hefur verið í bullandi vandræðum lengst af í vetur og 3-0 tap liðsins fyrir Manchester City í gær gerði útslagið fyrir Souness.

Einar ekki með gegn Norðmönnum

Skyttan Einar Hólmgeirsson verður ekki með íslenska landsliðinu í lokaleik liðsins í milliriðlum á morgun eftir að hafa fengið heilahristing í leiknum gegn Króatíu í dag. Einar var að sögn nafna hans Þorvarðarsonar langt fram í síðari hálfleikinn að ná áttum þar sem læknar stumruðu yfir honum við hliðarlínuna.

Verðum að klára Norðmenn

Hreiðar Guðmundsson, markvörður íslenska landsliðsins, var ekki kátur eftir tapið gegn Króötum í kvöld. "Þetta er ömurlegt. Við fengum tækifæri til að ná í stig undir lokin, en því miður gekk það ekki eftir, það vantaði herslumuninn. Það var slæmt að missa þá Alex og Einar, en við verðum bara að safna liði og klára Norðmennina á morgun," sagði Hreiðar, sem náði sér ekki á strik í leiknum í dag.

Balic of stór biti fyrir íslenska liðið

Króatar höfðu nauman sigur á íslenska landsliðinu í handbolta á EM í Sviss nú rétt í þessu 29-28 í hörkuleik. Það var ekki síst fyrir stórleik Ivano Balic sem lið Króatíu náði að tryggja sér sigurinn, en hann skoraði 8 mörk í leiknum, mörg þeirra á ótrúlegan hátt og var gríðarlega mikilvægur í varnarleiknum. Ólafur Stefánsson var markahæstur í íslenska liðinu með 8 mörk og Guðjón Valur Sigurðsson skoraði 7.

Guðjón Valur ekki sáttur

"Við töpum þessu á eigin klaufaskap því ég get ekki séð að þeir hafi verið neitt betri en við," sagði hornamaðurinn Guðjón Valur Sigurðsson hundsvekktur í leikslok, eftir að Íslendingar töpuðu fyrir Króötum í dag.

Haukar áfram á toppnum

Haukastúlkur eru enn á toppnum í Iceland Express deild kvenna í körfubolta, en þrír leikir voru á dagskrá í kvöld. Haukar lögðu Breiðablik auðveldlega á útivelli 87-63, ÍS lagði KR 88-67 og þá vann Keflavík sigur á grönnum sínum í Grindavík í toppslag liðanna 83-71.

Afleitt kvöld fyrir stórliðin

Stóru liðin í ensku úrvalsdeildinni áttu öll erfitt uppdráttar í leikjum sínum í kvöld. Á meðan Chelsea gerði jafntefli við Aston Villa, náði Liverpool aðeins í annað stigið gegn Birmingham á heimavelli þrátt fyrir að vera manni fleiri, Arsenal tapaði fyrir West Ham á heimavelli og Manchester United tapaði fyrir Blackburn í ævintýralegum leik á Ewoood Park.

Chelsea tapaði stigum á Villa Park

Chelsea tapaði dýrmætum stigum á Villa Park í kvöld þegar liðið gerði 1-1 jafntefli við Aston Villa. Arjen Robben kom gestunum yfir í fyrri hálfleik, en Luke Moore jafnaði í þeim síðari fyrir Villa. Manchester City burstaði Newcastle 3-0 með mörkum frá Riera, Cole og Vassell. Portmouth og Bolton skildu jöfn 1-1.

Jol sáttur við kaup Tottenham

Martin Jol, stjóri Tottenham, er hæstánægður með kaup félagsins fyrir lokun félagaskiptagluggans og segist búast við miklu af þeim Danny Murphy og Hossam Ghaly.

Spánn aftur á toppinn

Spánverjar eru komnir aftur á toppinn í 1. milliriðlinum á EM í Sviss eftir sigur á Úkraínu í lokaleik kvöldsins í riðlinum, 31-29. Spánverjar hafa því hlotið 7 stig í riðlinum, Frakkar 6 og Þjóðverjar 5. Spánn mætir Slóveníu á morgun og nægir eitt stig til að tryggja sér sæti í undanúrslitunum.

Danir lögðu Norðmenn

Danir lögðu Norðmenn 35-31 í lokaleik 2. milliriðilsins í kvöld og skutust með sigrinum upp fyrir okkur Íslendinga á markamun. Danska liðið hefur einu marki betri markatölu en íslenska liðið og því er ljóst að allt verður í járnum í lokaumferðinni á morgun.

Stóru liðin undir í hálfleik

Manchester United er undir 3-1 í hálfleik á Ewood Park gegn Blackburn í hálfleik, en þar hefur David Bentley skoraði tvö mörk og Lucas Neill bætti við þriðja markinu úr vítaspyrnu á síðustu augnablikum hálfleiksins. Louis Saha minnkaði muninn fyrir United. Þá er Arsenal að tapa 2-1 á heimavelli fyrir West Ham.

Frakkar burstuðu Póverja

Frakkar áttu ekki í erfiðleikum með Pólverja í 1. milliriðlinum á EM í Sviss í dag og unnu stórsigur 31-21. Frakkar eru þar með á toppi riðilsins með 6 stig, en Spánverjar geta komist í efsta sætið með sigri í Úkraínu í kvöld.

Chelsea yfir gegn Aston Villa

Nú er kominn hálfleikur í leikjunum þremur sem hófust fyrr í ensku úrvalsdeildinni. Chelsea hefur yfir 1-0 gegn Aston Villa á útivelli, þar sem Arjen Robben skoraði mark Chelsea. Manchester City er 2-0 yfir gegn Newcastle með mörkum frá Cole og Riera og þá er jafnt hjá Portsmouth og Bolton, 0-0.

Eiður Smári í byrjunarliði Chelsea

Eiður Smári Guðjohnsen er í byrjunarliði Chelsea sem sækir Aston Villa heim á Villa Park í ensku úrvalsdeildinni í kvöld. Eiður gat ekki leikið með liðinu í síðasta leik vegna veikinda, en er ný mættur aftur í slaginn.

Fullyrðir að Hiddink verði næsti þjálfari Englendinga

Breskir fjölmiðlar greina frá því í dag að heyrst hafi til Sven Göran Eriksson fullyrða við fólk á matsölustað í Svíþjóð að Guus Hiddink verði næsti þjálfari enska landsliðsins í knattspyrnu, en Eriksson lætur sem kunnugt er af störfum eftir HM í sumar.

Jafnt hjá Íslandi og Króatíu í hálfleik

Staðan í leik Íslands og Króatíu er jöfn 13-13 í hálfleik. Snorri Steinn Guðjónsson er markahæstur í íslenska liðinu með 4 mörk, þar af 1 úr víti, Ólafur Stefánsson hefur skoraði 3 mörk og þeir Einar Hólmgeirsson, Róbert Gunnarsson og Guðjón Valur Sigurðsson eru með 2 hver.

Rússar sigruðu Serba

Rússar unnu í dag næsta auðveldan sigur á Serbum og Svartfellingum í 2. milliriðli á EM í Sviss 29-21. Þetta þýðir að Rússar hafa tekið forystu í riðlinum með 6 stig, en nú klukkan 17 mætast Íslendingar og Króatar í sama riðli. Í 1. milliriðli mættust Þjóðverjar og Slóvenar, þar sem þýska liðið hafði betur 36-33.

Sex leikir í kvöld

Sex leikir eru á dagskrá í ensku úrvalsdeildinni í knattspyrnu í kvöld. Arsenal tekur á móti grönnum sínum í West Ham, Aston villa mætir Chelsea, Blackburn leikur við Manchester United, Liverpool mætir Birmingham, Manchester City tekur á móti Newcastle og Portsmouth fær Bolton í heimsókn.

Erfiður leikur við Króata í dag

Íslenska landsliðið á mjög erfiðan leik fyrir höndum gegn Króötum í milliriðli 2 í Gallen í dag klukkan 17. Leikur Serba og Rússa er þegar hafinn og klukkan 19:15 eigast við Norðmenn og Danir. Í 1. milliriðlinum mætast Slóvenar og Þjóðverjar klukkan 14:15, þá Pólverjar og Frakkar klukkan 16:45 og Úkraína og Spánn keppa klukkan 19:15.

Cech semur til 2010

Tékkneski markvörðurinn Petr Cech hjá Chelsea framlengdi í dag samning sinn við félagið til ársins 2010. "Ég kom hingað til að vinna titla á sínum tíma og ég hlakka mikið til að halda því áfram á næstu árum," sagði Cech, sem er 23 ára og er talinn einn af betri markvörðum heimsins í dag.

New Jersey stöðvaði Detroit

Lið New Jersey Nets stöðvaði í nótt 11 leikja sigurgöngu Detroit Pistons með 91-84 sigri á heimavelli sínum. Chauncey Billups skoraði 30 stig fyrir Detroit, en Jason Kidd skoraði 23 stig, hirti 12 fráköst og gaf 7 stoðsendngar hjá New Jersey.

Tottenham keypti Murphy á elleftu stundu

Úrvalsdeildarlið Tottenham keypti miðjumanninn Danny Murphy frá Charlton á elleftu stundu fyrir lokun félagaskiptagluggans á miðnætti í kvöld. Kaupverðið er rétt undir 2 milljónum punda og kveðst Murphy mjög spenntur að vera genginn í raðir félagsins.