Fram hafði betur í toppslagnum

Framarar gerðu góða ferð á Ásvelli í dag og lögðu Hauka í toppslag DHL-deildar karla í handbolta, 33-26. Jóhann Gunnar Einarsson skoraði 11 mörk fyrir Fram, þar af 9 úr vítum, en Arnar Pétursson skoraði 6 fyrir Hauka. Haukarnir byrjuðu betur í leiknum, en varnarleikur Fram skóp sigurinn í dag og greinilegt að liðið er til alls líklegt undir stjórn Guðmundar Guðmundssonar.

Manchester City með örugga forystu

Manchester City er að valta yfir lánlaust lið Birmingham á heimavelli sínum í lokaleik dagsins í ensku úrvalsdeildinni. Staðan í hálfleik er 3-0 fyrir City. David Sommeil kom liðinu yfir eftir aðeins 24 sekúndur, Joey Barton skoraði annað markið úr víti á 14. mínútu og Antoine Sibierski bætti við þriðja markinu á 39. mínútu.

Enn vinnur Reading

Ívar Ingimarsson og félagar í Reading unnu góðan útisigur á Milwall í ensku 1. deildinni í knattspyrnu í dag. Ívar lék að venju allan leiktímann í vörn Reading, en Brynjar Björn Gunnarsson kom inná sem varamaður í lokin. Jóhannes Karl Guðjónsson var í liði Leicester sem gerði jafntefli við Crew á heimavelli og þá var Hannes Sigurðsson í liði Stoke sem sem vann Luton 3-2.

Grindavík lagði Skallagrím

Grindvíkingar lögðu Skallagrím á heimavelli sínum í Grindavík í dag 92-89. Bandaríkjamaðurinn Jeremiah Johnson var stigahæstur í liði heimamanna með 30 stig, en Jovan Zdravevski skoraði 23 stig fyrir gestina. Þetta var því góður dagur í Grindavík, því fyrr um daginn vann kvennaliðið góðan sigur á grönnum sínum úr Keflavík.

Þrenna frá Michael Owen

Michael Owen skoraði þrennu fyrir Newcastle í dag þegar liðið lagði West Ham á útivelli 4-2 í ensku úrvalsdeildinni. Alan Shearer skoraði eitt mark fyrir Newcastle, Marlon Harewood skoraði eitt mark fyrir West Ham, en fyrra mark liðsins var sjálfsmark Nolberto Solano.

Heiðar lagði upp sigurmark Fulham

Heiðar Helguson kom inná í liði Fulham eftir um hálftíma leik í dag og lagði upp síðara mark liðsins í 2-1 sigri á Blackburn. Bolton burstaði Everton á útivelli 4-0, Portsmouth sigraði West Brom 1-0 og Wigan náði loks í sigur þegar liðið skellti lánlausu liði Charlton 3-0 með þrennu frá Henry Camara.

Wigan leiðir gegn Everton í hálfleik

Nú er kominn hálfleikur í fjórum af leikjunum fimm sem standa yfir í ensku úrvalsdeildinni. Wigan hefur 1-0 forystu gegn Hermanni Hreiðarssyni og félögum í Charlton, en það var Henry Camara sem skoraði mark Wigan.

Rooney og Van Nistelrooy voru frábærir

Sir Alex Ferguson var mjög ánægður með framgöngu leikmanna sinna í sigrinum á Aston Villa í ensku úrvalsdeildinni í dag og segir þá hafa brugðist vel við því að falla úr keppni í Meistaradeildinni. Sérstaklega hrósaði hann samvinnu Rooney og Van Nistelrooy.

Grindavík hafði betur í grannaslagnum

Grindavíkurstúlkur unnu nú áðan góðan sigur á grönnum sínum úr Keflavík í Iceland Express deild kvenna í körfuknattleik 89-83. Grindavík komst upp að hlið Hauka á toppi deildarinnar með sigrinum, en Keflavík er í þriðja sætinu. Jerica Watson fór á kostum í liði Grindavíkur í dag, skoraði 39 stig og var besti leikmaður vallarins.

Auðveldur sigur United

Manchester United var ekki í teljandi vandræðum með að leggja Aston Villa á útivelli í fyrsta leik dagsins í enska boltanum. United hafði sigur 2-0 á Villa Park með mörkum frá Ruud Van Nistelrooy og Wayne Rooney. Nú munar sex stigum á United og Chelsea, sem reyndar á leik til góða gegn Arsenal á morgun.

Manchester United yfir gegn Villa

Manchester United hefur yfir í hálfleik 1-0 gegn Aston Villa í fyrsta leik dagsins í ensku úrvalsdeildinni. Það var hollenska markamaskínan Ruud Van Nistelrooy sem skoraði mark United snemma leiks, en gestirnir hafa mikla yfirburði í leiknum á Villa Park.

Íhugar að leggja skóna á hilluna

David Moyes, stjóri Everton, segir að framherjinn Duncan Ferguson sé að íhuga að hætta að leika knattspyrnu því hann sé orðinn langþreyttur á fjölda meiðsla sem hafa þjakað hann lengi.

Detroit valtaði yfir Chicago

Fjöldi leikja var á dagskrá í NBA deildinni í körfubolta í nótt. Efsta lið deildarinnar Detroit Pistons valtaði yfir Chicago Bulls á heimavelli sínum og hefur nú unnið 17 af fyrstu 20 leikjum sínum á tímabilinu.

Valur tapaði í Digranesi

Topplið Vals í DHL-deild karla í handbolta sótti ekki gull í greipar HK í Digranesi í kvöld og tapaði 25-23. KA lagði granna sína í Þór í háspennuleik 26-25. Loks burstaði Stjarnan Selfoss 32-23. Valsmenn halda þó enn efsta sæti deildarinnar, en bæði Fram og Haukar geta skotist framúr Val á morgun. Þessi lið mætast einmitt í deildinni á morgun.

Vona að Chelsea og Barcelona hafi þroskast

Forráðamenn UEFA segjast vona að ekki sjóði uppúr í aðdraganda viðureignar Barcelona og Chelsea í þetta sinn, en mikið fjaðrafok varð í kring um rimmu liðanna í vor sem endaði með leikbönnum og sektum. "Ég ætla að vona að menn hafi lært af mistökum sínum í fyrra og einbeiti sér að því að leysa málin á knattspyrnuvellinum í þetta sinn," sagði William Gaillard hjá UEFA.

Tapaði áfrýjun sinni gegn Chelsea

Framherjinn Adrian Mutu tapaði í dag áfrýjun sinni á hendur fyrrum liði sínu Chelsea á Englandi, en hann var rekinn frá félaginu og samningi hans sagt upp í október á síðasta ári, eftir að Rúmeninn varð uppvís að neyslu kókaíns.

Ronaldinho spáir öðru klassísku einvígi

Framherjinn Ronaldinho hjá Barcelona, sem flestir hallast að því að sé besti knattspyrnumaður í heimi, spáir því að viðureign Chelsea og Barcelona í 16-úrslitum meistaradeildarinnar í ár fari á spjöld sögunnar sem klassísk viðureign, rétt eins og rimma þeirra í fyrra sem var sannarlega ógleymanleg.

Við erum með betri hóp en Chelsea

Jose Reyes hjá Arsenal er ekki smeykur fyrir grannaslaginn við Chelsea í ensku úrvalsdeildinni á sunnudaginn og þó heil sautján stig skilji liðin að í töflunni, segir hann að Arsenal sé með jafn góðann eða betri hóp en meistararnir.

Vill hafa vetrarfrí í úrvalsdeildinni

Mark Hughes, stjóri Blackburn segir að tími sé til kominn að innleiða vetrarfrí í ensku úrvalsdeildinni og segir að álagið á liðin í deildinni sé fáránlegt í kring um hátíðarnar, þar sem hans menn spila meðal annars fjóra leiki á átta dögum.

Artest sektaður

Vandræðagemlingurinn Ron Artest hjá Indiana Pacers var í gær sektaður um 10.000 dollara fyrir ummæli sín í Indianapolis Star á dögunum, þar sem hann fór fram á að verða skipt frá liði Indiana og sagði liðið betur komið án sín.

Schumacher byrjar vel

Fyrrum heimsmeistarinn Michael Schumacher er byrjaður að æfa á fullu eftir stutt frí og í gær náði hann frábærum tíma á æfingum á Jerez brautinni á Spáni. "Mér finnst ég mjög ferskur um þessar mundir og ég er ákaflega einbeittur," sagði Schumacher, sem vill eflaust gleyma síðasta ári sem fyrst og einbeita sér að því að komast á meðal þeirra bestu á ný.

Gæti hjálpað að falla úr Meistaradeildinni

Alex Ferguson segir að sú staðreynd að Manchester United verður ekki með í Meistaradeildinni eftir áramótin, gæti átt eftir að hjálpa liðinu í deild og bikar heimafyrir. Það komi þó ekki í endanlega í ljós fyrr en úr því verður skorið hvað hin ensku liðin komast langt í keppninni.

Hélt að eldingar kæmu ekki niður á sama stað tvisvar

Peter Kenyon sagðist allt eins hafa búist við því að lið hans Chelsea mundi dragast á móti stórliði í 16-liða úrslitum Meistaradeildarinnar í dag og hlakkar til að endurtaka leikinn frá í fyrra.

Sáttur við að mæta Benfica

Rafa Benitez, stjóri Liverpool, segir á heimasíðu félagsins í dag að hann sé sáttur við að mæta Benfica í 16-liða úrslitum meistaradeildarinnar og segir að þó Benfica verði erfiðir mótherjar, hefði Liverpool geta verið óheppnara með andstæðinga á þessu stigi keppninnar.

Þrír leikir í kvöld

Síðustu umferð fyrir jól í DHL-deild karla í handbolta lýkur um helgina, en hún hefst í kvöld með þremur leikjum. HK tekur á móti Val í Digranesi, Þór Akureyri tekur á móti grönnum sínum í KA og Selfoss fær Stjörnuna í heimsókn. Allir leikirnir hefjast klukkan 20. Fjórir leikir verða svo á morgun, en þar ber hæst stórleikur Hauka og Fram á Ásvöllum.

Ákvörðun Michelin hefur engin áhrif

Forráðamenn heimsmeistara Renault segja að ákvörðun Michelin dekkjaframleiðandans að draga sig út úr Formúlu 1 eftir næsta tímabil hafi engin áhrif á áform liðsins um að verja titilinn á næsta ári.

Vill vera áfram hjá Liverpool

Franski sóknarmaðurinn Djibril Cissé hefur nú gefið það út að hann vilji ekki fara frá Liverpool, þrátt fyrir að þurfa oft að sitja á tréverkinu. Cissé sagðist í haust vilja fara frá Liverpool því hann taldi landsliðsferil sinn í hættu af því hann fékk ekki að spila nógu mikið.

Verður ekki viðstaddur útför föður síns

Faðir knattspyrnustjórans Rafa Benitez hjá Liverpool lést í vikunni, en stjórinn spænski ætlar engu að síður að vera kyrr í Japan og ætlar að stýra liði Liverpool í úrslitaleiknum við Sao Paulo í heimsmeistarakeppni félagsliða um helgina.

Dregið í 32-liða úrslitin

Í dag var dregið í 32-liða úrslit Evrópukeppni félagsliða í knattspyrnu. Middlesbrough mætir þýska liðinu Stuttgart, Bolton mætir Marseille frá Frakklandi og Grétar Rafn Steinsson og félagar í hollenska liðinu AZ Alkmaar mæta Betis frá Spáni.

Fimmti sigur Houston í röð

Houston Rockets vann fimmta leik sinn í röð í nótt þegar liðið skellti Seattle á útivelli, en allt annar bragur hefur verið á liðinu síðan Tracy McGrady sneri aftur úr meiðslum. Þá vann Cleveland góðan sigur á Denver og meistarar San Antonio unnu nauman sigur á Minnesota.

Chelsea og Barcelona mætast aftur

Nú áðan varð ljóst hvaða lið mætast í 16-liða úrslitum Meistaradeildar Evrópu. Eiður Smári og félagar í Chelsea fá það erfiða verkefni að mæta Barcelona, en þessi lið háðu eftirminnilegt einvígi í keppninni í fyrra. Arsenal mætir Real Madrid og Liverpool mætir portúgalska liðinu Benfica.

Drátturinn í Meistaradeildinni beint á NFS

Í dag klukkan 11:00 verður dregið í 16 liða úrslit Meistaradeildar Evrópu. Áhugasömum er bent á að hægt er að sjá dráttinn í beinni útsendingu á sjónvarpsstöðinni NFS. Stöðinni er hægt að ná á rás 6 á Digital Ísland hjá 365 eða hér á Vísi VefTV.

AZ Alkmaar og Boro á toppnum

AZ Alkmaar, lið Grétars Rafns Steinssonar og Middlesbrough tryggðu sér tvö efstu sætin í D-riðlinum í Evrópukeppni félagsliða í kvöld og eru komin áfram í keppninni. Boro lagði Litex Lovech 2-0 með mörkum frá Massimo Maccarone á síðustu tíu mínútum leiksins. Grétar Rafn var í liði Alkmaar sem sigraði Grasshoppers frá Sviss.

Keflvíkingar úr leik

Keflvíkingar eru úr leik í Áskorendakeppni Evrópu í körfubolta eftir 105-90 tap fyrir Madeira frá Portúgal ytra í kvöld. Madeira vann því báða leikina nokkuð sannfærandi og er komið áfram í átta liða úrslit keppninnar.

Njarðvík lagði Fjölni

Njarðvíkingar lögðu Fjölni í Grafarvogi í úrvalsdeild karla í körfubolta í kvöld í fjörugum og skemmtilegum leik 90-77. Jeb Ivey var stigahæstur í liði Njarðvíkur með 30 stig, þar af 23 í fyrri hálfleik, Friðrik Stefánsson skoraði 26 stig og Brenton Birmingham var með 20. Nemanja Sovic skoraði mest hjá Fjölni, 27 stig og Fred Hooks bætti við 22 stigum.

Ekki tilbúinn að framlengja samning Cole

Stuart Pearce ætlar að bíða þar til í lok leiktíðar með að ákveða hvort samningur framherjans Andy Cole verður framlengdur eða ekki, en hinn 34 ára gamli Cole er sem stendur á eins árs samningi við City og hefur komið nokkuð á óvart í vetur. Cole hefur skorað sjö mörk í þeim þrettán leikjum sem hann hefur verið í byrjunarliðinu og hefur sýnt gamalkunna takta oft á tíðum.

Fær ekki að fara frá West Brom

Framherjinn Robert Earnshaw hjá West Brom fór fram á það að vera settur á sölulista hjá félaginu fyrir skömmu, því honum þótti ferill sinn hjá landsliði Wales í hættu því hann fékk lítið að spila með félagsliði sínu. Nú hefur Bryan Robson hinsvegar gefið það út að Earnshaw fari hvergi, enda missir West Brom tvo af sóknarmönnum sínum í Afríkukeppnina innan skamms.

Fær tveggja leikja bann

Miðjumaðurinn harðskeytti hjá Chelsea, Michael Essien, var í dag úrskurðaður í tveggja leikja bann af aganefnd UEFA fyrir ljóta tæklingu hans á Dietmar Hamann hjá Liverpool í leik liðanna í Meistaradeildinni á dögunum. Essien missir því af báðum leikjum Chelsea í 16-liða úrslitum keppninnar.

Fær markið gegn Wigan skráð á sig

Framherjinn Peter Crouch hjá Liverpool fær markið umdeilda sem Liverpool skoraði gegn Wigan á dögunum skráð á sig, en markið hafði fram að þessu verið skráð sem sjálfsmark. Sérstök nefnd sem sér um slík vafaatriði skilaði frá sér skýrslu í dag og greindi frá þessu. Crouch skoraði sem sagt tvö mörk í leiknum, rétt eins og í morgun gegn Deportivo Saprissa frá Kosta Ríka.

Hér á ég heima

Roy Keane var fyrir stundu tilkynntur sem nýr leikmaður Glasgow Celtic á Celtic Park, heimavelli liðisins. Þar sagði hann að það hefði alltaf verið draumur sinn að spila með liðinu. Hann segist ekki búast við því að vaða inn í byrjunarlið Celtic, en lét þó í það skína að hann væri kominn til að láta finna fyrir sér.

Wenger er öruggur í starfi

Lee Dixon, fyrrum leikmaður Arsenal, fullyrðir að knattspyrnustjóri félagsins, Arsene Wenger, búi við gott starfsöryggi þó árangur liðsins hafi verið langt undir væntingum í vetur.

Ajax er stærri klúbbur en Tottenham

Egypski framherjinn Mido hjá Tottenham, sem er í láni hjá Lundúnaliðinu frá Roma, segir að Ajax sé mun stærri klúbbur en Tottenham, en hann lék áður með hollenska liðinu.

Neita að hleypa Yakubu í æfingabúðir

Forráðamenn enska úrvalsdeildarliðsins Middlesbrough hafa neitað beiðni nígeríska knattspyrnusambandsins um að hleypa framherjanum sterka Yakubu í æfingabúðir mánuði fyrir Afríkukeppnina í knattspyrnu.

Montgomery hættur

Bandaríski spretthlauparinn Tim Montgomery hefur tilkynnt að hann sé hættur að keppa eftir að hann var dæmdur í tveggja ára keppnisbann vegna lyfjamisnotkunar á dögunum. Montgomery hefur alltaf haldið fram sakleysi sínu og kennir læknum sínum um að hafa verið dæmdur í bannið, þrátt fyrir að hafa ekki fallið á lyfjaprófi.

Verðum að leika vel á sunnudag

Hinn leggjalangi Peter Crouch, sem skoraði tvö mörk fyrir Liverpool í sigrinum á Deportivo Saprissa í dag, segir að Liverpool verði að leika jafn vel eða betur ef þeir ætli sér að sigra Sao Paulo í úrslitaleik mótsins á sunnudaginn.