Kosningar í Írak ákveðnar

Tilkynnt var í gær að fyrstu kosningarnar í Írak eftir fall Saddams Hussein verði haldnar 30. janúar. Ekki á að fresta kosningum vegna átaka í landinu. "Kjörstjórn hefur einróma samþykkt að íhuga 30. janúar sem kjördag," sagði formaður kjörstjórnar, Abdel Hussein al-Hindawi, við fréttamenn í Bagdad.

Nú liggja Danir í því

Hundruð Dana eru öskureiðir vegna umdeildra póstkorta frá lífeyrissjóði þeirra. Talsmaður sjóðsins biðst afsökunar og segir fyrirtækið hafa farið yfir strikið. Póstkortið er stílað á karlmanninn á heimilinu en vekur meiri athygli og jafnvel reiði hjá unnustum og eiginkonum, þegar það svífur inn um bréfalúguna eða póstkassann.

Danski þingmaðurinn látinn laus

Danskur þingmaður, Flemming Oppfeldt, sem er sakaður um að hafa kynferðislega misnotað þrettán ára dreng, hefur verið látinn laus. Úrskurður dómstóla þess efnis er þvert á úrskurð undirréttar sem á þriðjudaginn framlengdi gæsluvarðhald yfir þingmanninum. Flemming segist í dönskum fjölmiðlum vera saklaus.

Fékk sjúkragögn Arafats afhent

Ekkja Arafats, Suha, sótti í gær sjúkragögn hins látna eiginmanns síns á hersjúkrahúsið í París þar sem hann naut aðhlynningar síðustu daga ævi sinnar. Í gögnunum er dánarorsök tilgreind en palestínsk yfirvöld hafa sóst eftir að fá þær upplýsingar.

Tugur fallinn í morgun

Skæruliðar vopnaðir sjálfvirkum rifflum og sprengjuvörpum börðust við bandarískar og írakskar hersveitir í hverfum súnní-múslima í Bagdad í morgun. Að minnsta kosti sjö skæruliðar féllu og þrír lögreglumenn.

Fanga sleppt vegna mistaka

Lögregluyfirvöld í Manchester á Englandi leita nú manns sem ákærður er fyrir sex morðtilraunir en honum var sleppt fyrr í vikunni vegna mistaka. Maðurinn, sem sagður er mjög hættulegur, var hnepptur í gæsluvarðhald í síðustu viku og átti að mæta fyrir dómara í gær.

Enn kýta Frakkar og Bandaríkjamenn

Aðstoðarutanríkisráðherra Bandaríkjanna segir að Frakkar voni að þeim mistakist að koma á friði og lýðræði í Írak.

Viðurkenndi morðið á banabeði

Móðir í Kaliforníu viðurkenndi fyrir dóttur sinni á banabeði sínu að hún hefði myrt föður hennar. Líkið hefði hún geymt í frystikistu í 14 ár og látið fjölskylduna halda að hann hefði dáið í bílslysi. Móðirin lést úr krabbameini fyrir viku. Á fimmtudag fannst lík hins myrta þar sem hún hafði vísað á það, í birgðageymslu.

Aftökurnar halda áfram

Írakskir hryðjuverkamenn myrtu í dag enn tvo gísla sína og settu aftöku þeirra á Netið. Að þessu sinni voru fórnarlömbin tveir Kúrdar sem morðingjarnir segja að hafi tilheyrt lýðræðisflokki þjóðflokksins. Sá flokkur er annar af tveimur stjórnmálahreyfingum Kúrda sem á aðild að bráðabirgðastjórninni í Írak.

Deilt um skuldir Íraka

Ríkustu þjóðum heims gengur erfiðlega að ná samkomulagi um hvort og hversu mikið af skuldum Íraka þær felli niður. Erlendar skuldir Íraka eru um 122 milljarðar króna og hafa þeir beðið um niðurfellingu á þeim þar sem byrðin sé að sliga landið og hindra eðlilega uppbyggingu.

Nýnasistar skipuleggja hryðjuverk

Hópur sænskra nýnasista hefur verið handtekinn, grunaður um áætlun um morð og hryðjuverk. Fjórir hafa verið úrskurðaðir í gæsluvarðhald. Nýnasistarnir höfðu gert áætlun sem gerði ráð fyrir að lama mikilvægar stofnanir samfélagsins, svo sem orkuver, skóla, sjúkrahús og ráðhús.

Endurbætur í Fallujah

Bandarískir hermenn vinna nú að því að koma aftur á vatni, rafmagni og öðrum nauðsynlegum þjónustuþáttum í lag í borginni Fallujah í Írak. Það gæti tekið tímann sinn því Fallujah er nánast í rúst eftir bardagana undanfarnar vikur. Bandaríkjamenn treysta sér ekki til þess að segja til um hvenær íbúarnir, sem flúðu bardagana, geti snúið aftur. </font />

Bush varar Írana við

George Bush Bandaríkjaforseti varar Írana við að halda áfram framleiðslu kjarnavopna eins og fullyrt er að þeir geri í skýrslu Alþjóða kjarnorkustofnunarinnar, IAEA, sem gerð var opinber í vikunni.

13 tróðust undir

Að minnsta kosti þrettán tróðust undir og fjölmargir slösuðust í fagnaðarlátum vegna loforða Evrópusambandsins um fjárhagaðstoð í Vestur-Afríkuríkinu Togo í dag. Mannfjöldinn hafði fylkt liði í höfuðborginni Lome til að hylla forseta landsins í tilefni tíðindanna en hann hefur farið mikinn undanfarna mánuði í að fá Evrópusmabndið í lið með sér.

Dæmdur fyrir morð á blaðamönnum

Afganskur maður úr hersveitum talíbana var í dag dæmdur til dauða fyrir að myrða fjóra blaðamenn í stríðinu árið 2001. Hann hafði einnig myrt eiginkonu sína og limlest fjölda manns.

Sjö létust í sprengingu á Ítalíu

Að minnsta kosti sjö manns létu lífið í mikilli gassprengingu í tveggja hæða íbúðarhúsi á Ítalíu í dag. Slysið varð í smábænum Foggía í suðurhluta landsins. Sprengingin var svo öflug að hlutar úr útveggjum og þaki hússins þeyttust langar leiðir, og svo hrundi húsið til grunna.

Heimastjórnin fær sjúkraskrána

Frakkar hafa fullvissað heimastjórn Palestínu um að frændi Jassers Arafats, sem er erindreki í heimastjórninni, fái sjúkraskrá Arafats frá sjúkrahúsinu sem hann dó í. Alls kyns sögusagnir ganga um dánarorsökina, svo sem að eitrað hafi verið fyrir Arafat, hann hafi verið með skorpulifur, alnæmi og jafnvel fleiri banvæna sjúkdóma.

Lofthernaður gegn engisprettum

Ísraelar hafa enn einu sinni hafið mikinn lofthernað, en í þetta skipti gegn engisprettum, sem ráðast inn í landið í stórum hópum frá Afríku. 

Bush safnar liði

George Bush, forseti Bandaríkjanna, er byrjaður að safna liði gegn Íran og Norður-Kóreu vegna stefnu landanna í kjarnorkumálum. Forsetinn segir að ekki sé hægt að líða framleiðslu kjarnorkuvopna á Kóreuskaganum eða Miðausturlöndum. 

Umdeildur meðal starfsfólksins

Mikil óánægja starfsmanna Sameinuðu þjóðanna með yfirstjórn samtakanna hefur hvað eftir annað beinst að framkvæmdastjóranum Kofi Annan, þótt hann hafi sloppið með skrekkinn á föstudaginn

Þrýstir á Norður-Kóreu

George W. Bush Bandaríkjaforseti beindi spjótum sínum að Norður-Kóreu í gær þegar tveggja daga leiðtogafundur Asíu- og Kyrrahafsríkja hófst í Chile í gær

Skuldum létt af Írak

Þjóðverjar skýrðu í gær frá samkomulagi um að létta skuldum af Írökum í því skyni að gera þeim kleift að hefja fyrir alvöru uppbyggingu í landinu án þess að þurfa að sligast undir skuldabyrði.

Stoltur af fortíð sinni

Hinn nýi yfirmaður framkvæmdastjórnar Evrópusambandsins, Jose Manuel Durao Barroso, viðurkennir að hafa verið maóisti á yngri árum, og segist vera stoltur af því.

Kosningarnar í uppnámi?

Herskár íslamskur hópur ógnar væntanlegum frambjóðendum og kjósendum í fyrirhuguðum kosningum í Írak í janúar. Hópurinn hótar því að hver sá múslimi sem bjóði sig fram í kosningum verði refsað í nafni guðs.

Ópíumræktun í blóma

Ræktun ópíumvalmúa blómstrar sem aldrei fyrr í Afganistan og hefur aukist um 64 prósent frá því í fyrra. Þetta segir í nýrri skýrslu Sameinuðu þjóðanna. Þar kemur jafnframt fram að ræktun ópíumvalmúa er vaxtarbroddurinn í afgönsku efnahagslífi. 

Banamein Arafats upplýst?

Það ætti jafnvel að liggja fyrir í dag hvert banamein Jassers Arafats, fyrrverandi leiðtoga Palestínumanna, var. Sögusagnir hafa verið á kreiki um dánarorsök Arafats og menn hafa velt fyrir sér hvort eitrað hafi verið fyrir honum. Frændi leiðtogans er væntanlegur til Parísar í dag og munu frönsk yfirvöld láta honum í té sjúkraskýrslu Arafats.

Danskar stúlkur fara ránshendi

Penar unglingsstúlkur, stolt foreldra sinna, uppáhald kennara sinna og sakleysið upmálað fara nú sem eldur í sinu um verslanir í Kaupmannahöfn og stela þar öllu steini léttara. Að sögn lögreglunnar er þetta alveg nýr hópur búðaþjófa sem starfsfólk verslana á erfitt með að átta sig á.

Týndi hlekkurinn fundinn?

Fornleifafræðingar hafa fundið 13 milljón ára gamla beinagrind prímata sem talinn er síðasti sameiginlegi forfaðir bæði manna og mannapa. Mannapar, svo sem górillur og sjimpansar, eru taldir hafa skilið sig frá öðrum og minni öpum á þessum tíma og því er þetta hugsanlega hinn svokallaði „týndi hlekkur“.

Vopnahlé í Súdan

Stríðandi fylkingar í Súdan undirrituðu í morgun heit um að ná friðarsamningum fyrir árslok á fundi Öryggisráðs Sameinuðu þjóðanna í Kenía. Talið er að yfir tvær milljónir Súdana hafi látið lífið vegna borgarastríðsins.

Hótar látum ef upp kemst um svindl

Frambjóðandi frjálslyndra í forsetakosningunum sem fram eiga að fara í Úkraínu á sunnudaginn hefur hótað að vera með læti ef grunur leikur á svindli í kosningunum. Frambjóðandinn, Viktor Yushchenko sem er fyrrverandi forsætisráðherra landsins, segir að hann muni ganga fylktu liði um götum borgarinnar ef upp kemst að maðkur sé í mysunni.

Andspyrnan brotin á bak aftur

Talsmenn Bandaríkjahers segja að andspyrna í borginni Fallujah í Írak hafi nú verið brotin á bak aftur. Uppreisnarmenn láta þó enn til sín taka og hóta þeim ofbeldi sem taka þátt í boðuðum kosningum í janúar.

Dánartíðnin minnki um helming

Alþjóðaheilbrigðismálastofnunin mælir með nýrri lyfjameðferð fyrir HIV-smituð börn sem rannsóknir sýna að geti dregið úr dánartíðni þeirra um helming. Meðferðin felst í því að gefa börnunum algengt sýklalyf sem kostar um tíu krónur á dag. Á hverjum degi látast u.þ.b. 1.300 börn af völdum alnæmisveirunnar í heiminum.

Fölsuðum legókubbum fargað

Finnskir tollverðir hafa malað yfir tíu tonn af fölsuðum legókubbum, mélinu smærra, og verður duftið síðan brennt. Eins og allir vita eru hinir einu og sönnu legókubbar framleiddir í Danmörku. Kubbarnir sem finnska tollgæslan lagði hald á voru hins vegar framleiddir í Kína og var verið að flytja þá til Rússlands til sölu þar. </font /></font />

77 ára kona fær dauðadóm

Hæstiréttur Japans hefur staðfest að sjötíu og sjö ára gömul kona skuli hengd fyrir morðið á eiginmanni sínum og kunningjakonu. Konan var dæmd til dauða fyrir að hafa árið 1987 fengið ættingja til liðs við sig til að drepa eiginmanninn, gegn því að þeir fengju hlut af þrjátíu milljón króna líftryggingu hans.

Ósló dýrasta verslunarborg Evrópu

Það kveinka sér fleiri undan háu verðlagi en Íslendingar. Norðmenn eru nú í nokkurri geðshræringu yfir nýrri könnum sem sýnir að Ósló er dýrasta verslunarborg í Evrópu. Að strauja kortið á Karl Jóhannsgötu kostar 21 prósenti meira en meðaltalið er í ríkjum Evrópusambandsins.

Sonur Thatchers verði framseldur

Stjórnvöld í Afríkuríkinu Miðbaugs-Gíneu eru að leggja lokahönd á beiðni til Suður-Afríku um að framselja Mark Thatcher, son Margrétar Thatchers, fyrrverandi forsætisráðherra Bretlands. Thatcher er sakaður um að hafa átt þátt í samsæri um að steypa ríkisstjórn Miðbaugs-Gíneu af stóli.

Danir mótmæla reglum ESB

Danir munu berjast hart gegn nýjum reglum Evrópusambandsins um flutning á sláturdýrum. Í nýju reglunum er mönnum gefnar nánast frjálsar hendur um hversu lengi dýrin eru látin hírast á flutningabílum, auk þess sem ekkert er kveðið á um lágmarkspláss.

Snjórinn veldur usla í Noregi

Íbúar í Norður-Noregi veltast nú um af hlátri yfir brölti landa sinna í suðri. Fyrsti snjórinn féll í Ósló í vikunni og það var eins og við manninn mælt - það fór allt í steik á götum höfuðborgarinnar.

ESB kemur sér upp her

Evrópusambandið mun hafa fjórar viðbragðssveitir hermanna tilbúnar á næsta ári til þess að senda hvert sem er í heiminum, ef þörf krefur. Átta sveitir til viðbótar eiga að vera til staðar árið 2007. Um fimmtán hundruð hermenn verða í hverri sveit.

Árásum verður að linna

Fyrrverandi yfirmaður í öryggissveitum Palestínumanna, Mohammad Dahlan, sagði í dag að harðlínumenn verði að hætta árásum sínum á Ísrael til þess að skapa ró í kringum kosningarnar um eftirmann Jassers Arafats þann 9. janúar næstkomandi.

Bílstjórar í verkfall

Hætta er á að samgöngur í Finnlandi verði í lamasessi í næstu viku. Frá því í síðustu viku hafa 1.300 rútubílstjórar sem keyra sunnan við Helsinki verið í verkfalli. Nú hafa vörubílstjórar, lestarstjórar og starfsmenn flugvalla sagst ætla í samúðarverkfall í næstu viku.

Ályktað gegn hryðjuverkum

Á ráðstefnu ríkja Mið- og Suður-Ameríku, auk Spánar og Portúgal, náðist sátt um að styðja ályktun gegn hryðjuverkum, sem lögð var fram af Kúbverjum. Í henni eru stjórnvöld í Panama ámæld fyrir að veita fjórum Kúbverjum sakaruppgjöf fyrir tilraun til að ráða Fidel Castro, forseta Kúbu, af dögum árið 2000.

Annan ekki treyst

Reiknað er með að starfsfólk Sameinuðu þjóðanna muni kjósa um vantraustsyfirlýsingu gegn Kofi Annan, framkvæmdastjóra stofnunarinnar samkvæmt heimildum innan verkalýðsfélags starfsfólksins. Ástæðan er röð hneyksla sem stofnunin hefur verið tengd síðan hann tók við starfi framkvæmdastjóra.

Studdist við óstaðfesta heimild

Colin Powell, utanríkisráðherra Bandaríkjanna, notaðist við óstaðfesta heimild þegar hann sagðist hafa gögn undir höndum sem gæfu til kynna að Íranar ætluðu sér að þróa eldflaugar sem gætu borið kjarnorkusprengjur til skotmarka í öðrum löndum. Þetta hefur Washington Post eftir ónafngreindum embættismanni innan bandaríska stjórnkerfisins.

Neita samstarfi um herþjálfun

Þrátt fyrir að öll aðildarríki Atlantshafsbandalagsins hafi samþykkt að bandalagið tæki að sér þjálfun íraskra herforingja, í Írak, neituðu í það minnsta sex aðildarríkjanna, Belgía, Frakkland, Grikkland, Lúxemborg, Spánn og Þýskaland, að senda hermenn til Írak til að þjálfa herforingja. Þau bönnuðu hermönnum sínum í stjórnstöðvum Nató einnig að taka nokkurn þátt í aðgerðinni..