Norðurlöndin þögðu í eina mínútu

Norska þjóðin og öll norðurlöndin tóku þátt í einnar mínútu þögn til minningar um fórnarlömbin sem týndu lífi í árásunum síðastliðinn föstudag.

Íslensku listaverki stolið í Bretlandi

Rúmlega þrjúhundruð kílóa brons listaverki eftir Steinunni Þórarinsdóttur var stolið af hafnarbakka í Hull í Bretlandi í nótt. Steinunn vonar að verkið komi í leitirnar en breska lögreglan fer með rannsókn málsins.

Sautján teknir fyrir ölvunar- og fíkniefnaakstur um helgina

Níu ökumenn voru teknir fyrir ölvunarakstur á höfuðborgarsvæðinu um helgina og átta fyrir að aka undir áhrifum fíkniefna. Höfðu þrír þeirra ölvuðu og fjórir þeirra sem óku undir áhrifum fíkniefna þegar verið sviptir ökuleyfi.

Eldsupptök í Eden enn ókunn

Eldsupptök í Eden í Hveragerði eru enn ókunn, að því er fram kemur í tilkynningu frá lögreglunni á Selfossi. Vinnu lögreglu á vettvangi lauk í dag en við tekur úrvinnsla á þeim gögnum og munum sem tekin voru á vettvangi. Ljóst er að vinna þessi mun taka nokkurn tíma og niðurstöðu eða frekari upplýsinga ekki að vænta á næstunni um málið. Mikil mildi er að ekki urðu slys á fólki eða enn umfangsmeira tjón en raun varð á enda nánast logn þegar eldurinn kom upp og bárust hiti, reykur og eiturgufur því beint upp af eldstaðnum í stað þess að leggjast yfir nærliggjandi íbúðabyggð.

Seinni umræða um drög að stjórnarskrá hefst í fyrramálið

Síðari umræða Stjórnlagaráðs um drög að nýrri stjórnarskrá hefst í fyrramálið klukkan níu. Drögin telja alls níu kafla sem innihalda 113 stjórnarskrárákvæði. Á fundinum, sem er 18. fundur ráðsins, fara fram umræður um drögin og breytingartillögur. Gert er ráð fyrir að síðari umræða um drögin fari fram í ráðinu á morgun og miðvikudag. Loks fer fram atkvæðagreiðsla um frumvarpið í heild. Stjórnlagaráð afhendir forseta Alþingis, Ástu Ragnheiði Jóhannesdóttur, frumvarpið, föstudaginn 29. júlí, klukkan 10.30 í Iðnó.

Maður á sexugsaldri ók Hellisheiðina á 139 kílómetra hraða

13 ökumenn voru kærðir fyrir að aka of hratt í liðinni viku. Hraðast ók maður á sextugsaldri á Hellisheiði 139 km/klst þar sem leyfður hámarkshraði er 90 km/klst og verður hann vart talinn til góðrar fyrirmyndar sér yngri ökumönnum í umferðinni. 7 umferðaróhöpp voru tilkynnt til lögreglu öll án teljandi slysa. Einn ökumanna úr þessum óhöppum svaf úr sér áfengisvímu í klefa lögreglu s.l. nótt en bifreið hans lenti út af Þingvallavegi við Kjósaskarð. Hann var látinn laus undir hádegi í dag eftir yfirheyrslu. 1 ökumaður var kærður fyrir að aka undir áhrifum ávana og fíkniefna en í þvagi hans greindist THC . Blóðsýni hefur verið sent rannsóknarstofu Háskólans til greiningar og hlýtur málið framgang eftir þeim niðurstöðum sem þaðan fást.

Aukamiðar í Herjólfs - tímabundin fjölgun farþega

Rekstraraðili Herjólfs, Eimskip, hefur fengið leyfi til að fjölga tímabundið farþegum um borð í kring um Þjóðhátíð. Um er að ræða ferðir Herjólfs á fimmtudegi og föstudegi fyrir Þjóðhátíð og mánudag og þriðjudag eftir hana.

Tryggvagata verður tvístefnugata

Tryggvagötu milli Lækjargötu og Pósthússtrætis verður í fyrramálið breytt í tvístefnugötu til að liðka fyrir flæði umferðar í miðborginni frá austri til vesturs. Breytingin er gerð í tilraunaskyni til eins árs og standi síðar vilji til að festa breytinguna í sessi þarf að endurskoða deiliskipulag svæðisins með það í huga. Vinna við gatnamerkingar fer fram í nótt, aðfaranótt þriðjudagsins 26. júlí, og skiltum verður breytt í fyrramálið. Vegfarendur beðnir um að sýna aðgát meðan breytingar standa yfir. Framkvæmdin sem slík er einföld, en breyta þarf skiltum og mála yfirborð gatna. Breytingin var samþykkt í umhverfis- og samgönguráði og staðfest í borgarráði 19. maí sl. Rekstraraðilar á svæðinu hafa þegar verið upplýstir.

Hátt í 10 þúsund fengu ofgreiddar bætur

Um 9500 manns fengu ofgreiddar bætur frá Tryggingastofnun ríkisins og þurfa að endurgreiða samtals 1,2 milljarða króna til baka. Þetta kemur fram í frétt á vef Tryggingastofnunar. Af þessum 9500 voru 3000 með 100 þúsund eða meira í ofgreiddar bætur. Viðkomandi aðilar munu þurfa að greiða þessar upphæðir til baka.

Minningarbók liggur frammi í sendiráðinu

Hópur fólks safnaðist saman í sendiráði Noregs á Íslandi að Fjólugötu 17 í Reykjavík klukkan tíu í morgun til að minnast þeirra sem létust í hryðjuverkunum í Osló og Útey á föstudaginn.

Með amfetamín í aftursætinu

Ríkissaksóknari hefur ákært þrjátíu og sex ára karlmann fyrir að reyna að smygla tæplega fjórum kílóum af amfetamíni til landsins.

Fundu manninn heilann á húfi

Björgunarsveit Landsbjargar á Sauðárkróki var kölluð út undir miðnætti til að leita að manni, sem farið var að óttast um.

Ölvaður velti bíl á Mosfellsheiði

Ölvaður ökumaður slapp lítið meiddur þegar hann missti stjórn á bíl sínum á Mosfellsheiði á Þingvallavegi í gærkvöldi með þeim afleiðingum að bíllinn fór útaf og valt nokkrar veltur.

Mannlaust íbúðahús gjöreyðilagðist í eldi á Patreksfirði

Mannlaust íbúðarhús, sem verið var að gera upp á Patreksfirði, gjöreyðilagðist í eldi í nótt, en engan sakaði.

Þyrlan sótti veika konu um borð í skemmtiferðaskip

Þyrla Landhelgisgæslunnar sótti veika konu um borð í skemmtiferðaskip norðaustur af Langanesi í gærkvöldi og fluttu hana á sjúkrahúsið á Akureyri, þar sem hún liggur nú.

Konurnar sjö leita til fagráðs um kynferðisafbrot

Konurnar sjö, sem sökuðu Gunnar Þorsteinsson, fyrrverandi forstöðumann krossins um kynferðisbrot, ætla að leita til nýstofnaðs fagráðs um kynferðisbrot, þar sem lögreglustjórinn á höfuðborgarsvæðinu hefur vísað málunum frá.

Ekki bara fyrir Þjóðhátíð

„Við viljum meina að þetta sé fyrsta varanlega útisviðið á Íslandi,“ segir Tryggvi Már Sæmundsson framkvæmdastjóri ÍBV, en verið er að klára annan áfanga af þremur við mikið svið í Herjólfsdal. Það verður tekið í notkun nú á komandi Þjóðhátíð.

Allir læknar kallaðir á vakt á föstudag

Gísli Bergmann, svæfinga- og gjörgæslulæknir hjá Ríkissjúkrahúsinu í Ósló, hafði nýlokið vakt er sprengingin varð í miðborg Óslóar. Hann segir fólk enn slegið eftir atburðinn.

Ætla að flytja inn kjöt í næsta mánuði

Tollkvótar sjávarútvegs- og landbúnaðarráðherra vegna innflutnings á landbúnaðarafurðum stangast á við stjórnarskrána. Þetta er álit umboðsmanns Alþingis sem tók málið fyrir eftir málaleitan Samtaka verslunar og þjónustu (SVÞ). Ráðherra fékk heimild til álagningar tollanna árið 2005, en þá gegndi Guðni Ágústson embættinu.

Ungmennin þéna vel í fiskvinnslunni

Ákvörðun Jóns Bjarnasonar, sjávarútvegs- og landbúnaðarráðherra, í maí síðastliðnum um að auka karfakvótann um tíu þúsund tonn hefur heldur betur haft áhrif á líf 83 ungmenna sem nú þéna allt að fjögur hundruð þúsund á mánuði í landvinnslunni hjá HB Granda í Reykjavík. Margir þeirra koma á leigubíl, sem HB Grandi greiðir.

Íslendingar sýna samhug

Fórnarlamba árásanna í Noregi var minnst við guðsþjónustur víða um land í gær. Fjölmennt var við messu í Dómkirkjunni í gær og flutti Dag Wernö Holter, sendiherra Noregs hér á landi, ávarp og sagði að árásunum hefði verið beint gegn grunngildum norsks samfélags.

Krefjast skaðabóta vegna brota ríkisins

Erlingur Sveinn Haraldsson og Örn Snævar Sveinsson, sem hafa upp á vasann álit frá Mannréttindanefnd Sameinuðu þjóðanna um að íslenska ríkið hafi brotið á þeim með því að dæma þá fyrir að veiða án kvóta, sendu Ögmundi Jónassyni innanríkisráðherra bréf í þessum mánuði þar sem þess er krafist að ríkið bregðist við þessu áliti. Í því felst að ríkið viðurkenni að það sé skaðabótaskylt gagnvart tvímenningunum og að núverandi fiskveiðikerfi verði lagt af eins og það er.

Sækja veikan mann í skemmtiferðarskip

Þyrla Landhelgisgæslunnar fór í loftið um klukkan sjö í kvöld en tilkynnt var veikindi manns um borð í skemmtiferðaskipi norðaustur af landinu. Ekki liggur fyrir hversu veikur maðurinn er en gert er ráð fyrir að farið verði með hann á Landspítalann í Fossvogi eða á Fjórðungssjúkrahúsið á Akureyri. Áætlað er að þyrlan komi til landsins um klukkan tíu í kvöld.

Nýtt upphaf, nýtt líf - segir Gunnar í Krossinum

Rannsókn lögreglu á meintum kynferðisbrotum Gunnars Þorsteinsson, fyrrverandi forstöðumanns Krossins, hefur verið hætt. Í viðtali við Stöð 2 í kvöld segir hann niðurstöðu lögreglunnar merkja nýtt upphaf í hans lífi.

Herjólfur siglir klukkan 17:30

Fyrsta ferð Herjólfs í dag verður farin klukkan 17:30 frá Vestmannaeyjum og kl. 19:00 frá Landeyjahöfn. Ferðir Herjólfs voru felldar niður í morgun vegna veðurs og ölduhæðar. Farþegum er bent á að hafa samband við afgreiðslu varandi frekari upplýsingar.

Fjársjóðir í flæðarmálinu

Í dag verður hinn árlegi barnadagur haldinn hátíðlegur í Viðey en á dagskrá verður meðal annars flugdrekagerð og barnamessa.

Herjólfur siglir ekki - næst athugað klukkan fimm

Enn ríkir óvissa um siglingar Herjólfs í dag en næsta athugun verður klukkan 17 í dag, samkvæmt upplýsingum frá Eimkip.

Elding í vél Icelandair - röskun á flug félagsins í dag

Eldingu laust niður í flugvél Icelandair rétt áður en hún lenti á flugvelli í París um miðjan dag í gær. Einhver röskun verður á flugi félagsins í dag vegna atviksins.

Festi hendina í marningsvél

Fimmtán ára drengur slasaðist í fiskvinnslunni Nöf í Vestmannaeyjum um hálf átta leytið í morgun þegar hann festi hægri hönd í marningsvél.

Níu þúsund á Mærudögum

Nóttin var svo að segja tíðindalaus hjá lögreglu og slökkviliði höfuðborgarsvæðisins. Tveir ökumenn voru stöðvaðir í Borgarnesi grunaðir um ölvun við akstur og hafði lögreglan á Egilsstöðum afskipti af nokkrum einstaklingum í tengslum við tónlistarhátíðina Bræðsluna.

Norðmenn minnast fórnarlambanna

Minningarathafnir fara nú fram í flestum kirkjum Noregs til að minnast þeirra nítíu og tveggja sem staðfest er að féllu í sprengju og skotárásum í landinu á föstudag. Haraldur fimmti Noregskonungur og Sonja drottning eru við minningarathöfn í dómkikrjunni í Osló.

Herjólfur siglir ekki vegna veðurs

Vegna veðurs og ölduhæðar á milli Vestmannaeyja og Landeyjahafnar falla ferðir Herjólfs klukkan 08:30 frá Eyjum og 10:00 frá Landeyjahöfn niður.

Druslur í miðbænum

Druslulega klæddir hópar gengu fylktu liði á hvorki meira né minna en fjórum stöðum á landinu í dag. Tilefnið var hin svokallaða drusluganga en upphaflega átti hún einungis að fara fram á höfuðborgarsvæðinu. Áhugi Íslendinga lét þó ekki á sér standa og voru þrjár göngur skipulagðar til viðbótar, á Akureyri, Ísafirði og í Reykjanesbæ.

Þrefaldur næst

Lottópotturinn verður þrefaldur næsta laugardag þar sem enginn var með allar tölurnar réttar í útdrætti vikunnar. Fjórir unnu 100 þúsund krónur í Jókernum en þeir voru með 4 réttar tölur í réttri röð. Miðarnar voru seldir hjá Olís Langatanga, Mosfellsbæ og þrír voru í áskrift.

Sorg í hjarta Jóhönnu

"Þetta var mjög hjartnæm athöfn sem snart hvern einasta mann sem hér var mjög djúpt,“ sagði Jóhanna Sigurðardóttir forsætisráðherra . Hún sagðist finna mikla hryggð í hjarta sínu vegna fjöldamorðanna í Noregi í gær.

Óvíst hvort Gunnar verður aftur forstöðumaður Krossins

Gunnar Þorsteinsson, fyrrverandi forstöðumaður Krossins, segir það óráðið á þessari stundu hvort hann muni taka aftur við forstöðumannastarfinu. Gunnar var sakaður um kynferðisbrot gegn nokkrum fyrrverandi safnaðarmeðlimum í Krossinum og kærður til lögreglu vegna þess. Það var síðan greint frá því í dag að lögreglan hefði látið málið niður falla.

Svifryk á höfuðborgarsvæðinu

Mistur hefur verið í efri byggðum á höfuðborgarsvæðinu í dag en um er að ræða svifryk sem sennileg berst frá öskufallssvæðinu fyrir austan. Samkvæmt upplýsingum frá Veðurstofu Íslands má búast við öskufoki syðst á landinu fram á nótt, einkum á Vík og vestur fyrir Eyjafjöll, þar sem suðaustlægar áttir eru ríkjandi og töluverður vindur. Búist er við úrkomu í nótt og í fyrramálið ásamt því að draga mun smám saman úr vindstyrk er líður á morgundaginn og má reikna með að loftgæði batni í kjölfarið.

Kærum gegn Gunnari í Krossinum vísað frá

Saksóknari lögreglunnar á höfuðborgarsvæðinu hefur vísað kærum frá á hendur Gunnari Þorsteinssyni, fyrrverandi forstöðumanni trúfélagsins Krossins, en nokkrar konur sökuðu Gunnar um kynferðisofbeldi.

Missti stjórn á bílnum þegar dekkið sprakk

Þrjú ungmenni sluppu ómeidd þegar að fólksbíll sem þau voru í fór út af veginum á Hellisheiðinni fyrr í dag. Samkvæmt upplýsingum frá fréttamanni, sem kom að slysinu, virðist sem dekk hafi sprungið á bílnum og ökumaðurinn misst stjórn á því í kjölfarið. Mikill vindur er á heiðinni og biður lögreglan á Selfossi fólk um að keyra varlega og hafa öryggisbeltin spennt.

Karl hvetur presta til að minnast á norsku þjóðina á morgun

Karl Sigurbjörnsson, biskup Íslands, sendi í dag prestum bréf og hvatti til þess að norsku þjóðarinnar sé sérstaklega minnst í guðsþjónustum morgundagsins. Sérstök minningarathöfn verður einnig í Dómkirkjunni í Reykjavík í guðsþjónustu klukkan 11 þar sem biskup Íslands predikar og sendifulltrúi Norðmanna á Íslandi, Silje Arne Kleiv flytur ávarp.

Jón Gnarr sendir samúðarkveðju

Jón Gnarr, borgarstjóri í Reykjavík, hefur sent borgarstjóra Oslóarborgar, Fabian Stang og sendiherra Noregs á Íslandi, dag Vernö Holter, samúðarkveðjur og boð um alla þá aðstoð sem gæti hugsanlega komið að gagni vegna atburðana í Noregi í gær. Í tilkynningu frá Reykjavíkurborg segir að vinátta Reykjavíkur og Oslóar eigi sér langa hefð og eru stöðug og náin samskipti milli borganna tveggja.

Íslensk hjúkrunarkona á vaktinni í Osló

"Ástandið var mjög "kaótískt" til að byrja með, fyrst eftir að fréttist af sprengingunni í Osló voru allir mjög sjokkeraðir og síðan enn frekar þegar fréttist af skotárásinni," segir Anna María Ólafsdóttir, hjúkrunarfræðingur, sem vinnur á spítala í Sandvika sem er skammt frá Osló.

Þetta var fjöldamorðinginn að hugsa

Skrif Anders Behring á norska öfgavefinn document.no hafa verið þýdd á ensku. Þar kemur fram djúpstætt hatur hans á fjölmenningarstefnu og Íslam sem hann segir vera að taka yfir Evrópu.

Jóhanna - Hugur okkar hjá norsku þjóðinni

"Þetta eru svo hörmulegir atbuðir að engin orð fá því lýst. Við finnum innilega til með norsku þjóðinni á þessum hræðilegu tímum. Hugur okkar er með Norðmönnum og ekki síst fórnarlömbum og aðstandendum þeirra sem eru kannski að ganga í gegnum erfiðustu tíma sem Norðmenn hafa gengið í gegnum,“ segir Jóhanna Sigurðardóttir, forsætisráðherra.

Fórnarlamba minnst í Eyjum

Stafkirkjan á Heimaey verður opin í dag og hægt verður að minnast þeirra sem misst hafa lífið í árásunum í Osló og Útey í gær. Kirkjan er opin frá klukkan 11 til 17, flaggað verður í hálfa stöng og hægt er að rita samúðarkveðjur í sérstaka minningarbók þar í dag og næstu daga.