Þúsaldarmarkmiðin í hættu

Þúsaldarmarkmið Sameinuðu þjóðanna um bættan hag þróunarríkjanna eru í hættu vegna loforðaflaums en lítilla efnda. Framkvæmdastjóri Sameinuðu þjóðanna skorar á ríki heims að láta verkin tala.

Taka þátt í uppbyggingu samgöngumiðstöðvar

Iceland Express ætlar að taka þátt í uppbyggingu samgöngumiðstöðvar við Reykjavíkurflugvöll en félagið stefnir að því að hefja innanlandsflug á næsta ári. Samgönguráðherra fagnar samkeppninni.

Veiðar á undan viðræðum

Það fór vel á með Bush Bandaríkjaforseta og Pútín forseta Rússlands þar sem þeir skelltu sér í veiðiferð nærri sumardvalarstað Bush-fjölskyldunnar í Main-ríki í Bandaríkjunum í dag. Leiðtogarnir voru þar umkringdir lífvörðum en létu það ekki aftra sér í að reyna að landa þeim stóra.

Vegskálar við Óshlíðargöng gætu orðið þeir lengstu

Útlit er fyrir að vegskálar við fyrirhuguð Óshlíðargöng verði þeir lengstu sem reistir hafa verið hér á landi. Nú standa yfir tilraunaboranir vegna jarðganga um Óshlíð.

Öryggi vega kortlagt

Íslendingar ættu að geta skipulagt ferðir sínar um landið út frá öryggi vega innan skamms. Félag íslenskra bifreiðaeigenda og Umferðarstofa hafa gert úttekt á öryggi vega landsins og munu halda því áfram í sumar.

Reykjanesbær mun nýta sér forkaupsrétt í Hitaveitu Suðurnesja

Árni Sigfússon, bæjarstjóri í Reykjanesbæ, segir að Reykjanesbær hafi hug á að nýta sér forkaupsrétt á 15% hlut ríkisins í Hitaveitu Suðurnesja. Hann segist gjarnan vilja að Geysir Green Energy eignist ákveðinn hluta í fyrirtækinu en að hámarki um 30%

Læknar meðal grunaðra

Læknir menntaður í Írak og annar frá Jórdaníu eru meðal sjömenninganna sem breska lögreglan hefur í haldi vegna hryðjuverkaárásar í Skotlandi á laugardaginn og bílsprengna sem gerðar voru óvirkar í Lundúnum á föstudaginn. Faðir jórandska læknisins, sem hefur unnið á tveimur sjúkrahúsum á Englandi, segist viss um að sonur sinn tengist ekki hryðjuverkum.

LÍÚ vill ekki ganga jafnlangt og Hafró í skerðingu þorskkvóta

Landsamband íslenskra útvegsmanna leggur til að veitt verði um 30 þúsund tonnum meira af þorski en Hafrannsóknarstofnun leggur til, byggðakvóti og línumismunun verði lögð niður ásamt veiðigjaldi og hvalveiðar stórauknar. Búist er við að sjávarútvegsráðherra tilkynni um verulega skerðingu á þorskkvóta á morgun.

Launabaráttu lauk með slagsmálum

Tveir pólskir verkamenn lentu í átökum við syni yfirmanns síns í Mosfellsbæ í morgun. Svo virðist sem slagsmálin hafi brotist út vegna óánægju pólverjanna með launin sín. Mennirnir sögðu upp á staðnum.

Lystrupsprengjan gerð af viðvaningum

Helstu sprengjusérfræðingar Danmörku segja að sprengingin í Lystrup hafi verið gerð af viðvaningum. Jørgen Schneiders, danskur sprengjusérfræðingur, telur að sprengjan hafi verið gerð úr krýsantema, sem er jurtategund. Hann telur ótrúlegt að bensín hafi verið í sprengjunni.

Stökk út úr gaffallyftara á ferð

Maður slasaðist í vinnu við Skarðsmýrarfjall. Slysið varð með þeim hætti að starfsmaður var að aka gaffallyftara á milli staða. Er hann var kominn niður í bratta brekku fannst honum sem hemlar hefðu bilað. Ökumaður lyftarans sá sér þann kost vænstan að stökkva af lyftaranum og við það mun hann hafa handleggsbrotnað.

Utanríkisráðherra hitti aðalframkvæmdastjóra Flóttamannahjálpar SÞ

Ingibjörg Sólrún Gísladóttir utanríkisráðherra hitti António Guterres, aðalframkvæmdastjóra Flóttamannahjálpar Sameinuðu þjóðanna (UNCHR), á einkafundi í tengslum við leiðtogafund Afríkusambandsins í Gana.

Mesti hitinn

Mesti hiti sem mælst hefur á Íslandi síðan mælingar hófust er 30,5 stiga hiti á Teigarhorni í Berufirði 22. júní 1939. Mesti hiti sem mælst hefur í Reykjavík er 24,3 stiga hiti 9. júlí 1976.

Staðið verði við þjóðréttarlegar skuldbindingar Íslands

Þingmenn Vinstri-grænna telja nauðsynlegt að ríkisstjórnin taki ákvörðun um að staðið verði við þjóðréttarlegar skuldbindingar Íslands samkvæmt loftslagssamningi Sameinuðu þjóðanna og að veitt verði svigrúm til þess að ljúka rammááætlun um nýtingu vatnsafls og jarðvarma áður en nokkrar heimildir verði veittar til frekari uppbyggingar orkufreks iðnaðar.

Lieberman vill fjölga öryggismyndavélum

Joe Lieberman öldungadeildarþingmaður í Bandaríkjunum, segist vilja fjölga öryggismyndavélum í landinu. Hann vill taka Breta til fyrirmyndar í þeim efnum og telur að öryggismyndavélar, sem dreift er mjög víða um helstu borgir í Bretlandi, hafi átt þátt í því að hafa uppi á grunuðum í eftir tilraunir til hryðjuverka þar um helgina.

Braut lög um meðhöndlun úrgangs

Karlmaður var í Héraðsdómi Vesturlands í dag fundinn sekur fyrir brot á lögum um náttúruvernd, hollustuhætti, mengunarvarnir og meðhöndlun úrgangs. Maðurinn, sem er starfsmaður fyrirtækis sem sérhæfir sig í holræsahreinsun, var í tvígang staðinn að því að sturta úrgangi úr rotþróm í hraungjótu skammt frá Svalþúfu í Snæfellsbæ.

Hiti yfir 20 stig í Grafarvogi

Einmunablíða er um mest land og er nú 21 stigs hiti á Þingvöllum. Veðurblíðan, sem hefur verið lýst af innilokuðum skrifstofustarfsmönnum sem ,,óþolandi", mun að líkindum halda eitthvað áfram.

Ríkislögreglustjóri segir ekki þörf á hertum öryggiaðgerðum hérlendis

Greiningardeild ríkislögreglustjóra hefur fylgst með atburðum í Bretlandi þar sem bílsprengjur fundust í bifreiðum í London og atburðum á Glasgow flugvelli. Í tilkynningu frá embættinu segir, að áfram sé fylgst með málinu og farið hafi verið yfir hvort ástæða sé til að grípa til hertra öryggisaðgerða hérlendis. Á þessu stigi er ekki talin sérstök ástæða til slíks.

Átta látnir í sprengingu í Yemen

Maður sprengdi sig í loft upp í bíl á ferðamannastað nærri fornu musteri Yemen í dag. Átta létu lífið, sex spænskir ferðamenn og tveir Yemenar. Sjö spánverjar til viðbótar særðust í árásinni.

Sala á Hitaveitu Suðurnesja beinist ekki gegn Geysi Green Energy

Ákvörðun Hafnafjarðarbæjar um að selja hlut sinn í Hitaveitu Suðurnesja til Orkuveitu Reykjavíkur beinist ekki gegn Geysi Green Energy efh. Þetta kemur fram í tilkynningu frá bæjarráði Hafnarfjarðar. Í yfirlýsingu Grindavíkurkaupstaðar vegna sölunnar kemur fram að nú sé búið að eyða mikilli óvissu um hag minni hluthafa í hitaveitunni en að mati bæjarstjórnar var hætta á að þeir yrðu fyrir borð bornir eftir að ríkið seldi sinn hlut.

Óttast stórbrotin hryðjuverk

Leynileg bandarísk lögregluskýrsla sem er í undirbúningi fyrir Heimavarnarráðið varar því að al Qaeda samtökin séu að skipuleggja stórbrotin hryðjuverk nú í sumar. Háttsettur embættismaður með aðgang að skýrslunni greinir frá þessu við ABC fréttastofuna. Hann segir hryðjuverkin sem lögreglan óttast vera í anda þeirra sem voru framin 11 september.

Orkuveita Reykjavíkur kaupir í Hitaveitu Suðurnesja

Stjórn Orkuveitu Reykjavíkur samþykkti einróma á fundi sínum í dag samninga við Grindavíkurkaupstað og Hafnarfjarðabæ um kaup á hlutum í Hitaveitu Suðurnesja hf. Samkvæmt samningunum nýta bæði sveitarfélögin forkaupsrétt sinn á 15 prósent hlut ríkisins í Hitaveitu Suðurnesja og selja síðan Orkuveitunni þá hluti.

Vilja hærra aflamark og niðurfellingu byggðakvóta

Nauðsynlegt er að aflamark í þorski verði 25 til 30 þúsund tonnum meira á næsta fiskveiðiári en tillögur Hafrannsóknarstofnunar gera ráð fyrir. Þetta kemur fram í yfirlýsingu frá Landssambandi íslenskra útvegsmanna. Sambandið vill ennfremur að línumismunun og byggðakvóti verði felldur niður.

Einn grunaðra í Glasgow er íraskur læknir

Svæði í kringum Royal Alexandra spítalann í Paisley hverfinu í Glasgow var rýmt í dag og sprengja látin springa þar undir stjórn lögreglu, samkvæmt fréttastofu Sky News. Hverfið er skammt frá flugvellinum í Glasgow. Að sögn fréttastöðvarinnar er einn hinna handteknu læknir frá Írak, Bilal Abdulla.

Kallar á umræðu um staðsetningu Reykjavíkurflugvallar

Umsókn flugfélagsins Iceland Express um aðstöðu til millilandaflugs á Reykjavíkurflugvelli kallar á niðurstöðu um framtíðarstaðsetningu flugvallarins að mati Björns Inga Hrafnssonar, formanns borgarráðs. Hann segir þörf á almennri umræðu um málið áður en ákvarðanir verða teknar.

1.600 Íslendingar á leið á Hróaskelduhátíðina

Um 45.000 manns eru nú komnir á Hróaskelduhátíðina. Svæðið var opnað á sunnudagskvöldið en hátíðin nær hámarki næstu helgi. 1.600 íslendingar hafa keypt miða á hátíðina og verða samkvæmt upplýsingum á heimasíðu hennar 2 % gesta.

Ráðherra kynnir tillögur um aflaheimildir

Þingflokkur sjálfstæðismanna kemur saman klukkan fimm í dag en þá mun Einar K. Guðfinnsson, sjávarútvegsráðherra, kynna tillögur sínar um aflaheimildir fyrir næsta fiskveiðiár. Ríkisstjórnin fundar um málið á morgun.

Umferð gekk betur þessa helgi en fyrir viku

Umferð til höfuðborgarsvæðisins eftir Vesturlandsvegi og Suðurlandsvegi gekk mun betur í gær, en fyrir viku, þegar miklar umferðartafir urðu. Að sögn lögreglu urðu engin slys og engin teljandi óhöpp á þessum aðal umferðaræðum.

Ræðst í dag hvort Hafnarfjörður og Reykjanesbær nýti forkaupsrétt í Hitaveitu Suðurnesja

Það ræðst væntanlega á bæjarstjórnarfundum í Hafnarfirði og Reykjanesbæ í dag hvort bæjarfélögin muni nýta forkaupsrétt í Hitaveitu Suðrunesja. Frestur þeirra til að ákveða sig rennur út á morgun. Ef bæjarstjórnirnar ná ekki samkomulagi um að kaupa 34 prósnet, eða ráðandi meirihluta í félaginu,

Berezovsky ákærður fyrir að hvetja til valdaráns

Saksóknarar í Rússlandi hafa ákært rússneska auðkýfinginn Boris Berezovsky fyrir að hvetja til valdaráns. Lögfræðingur hans skýrði frá þessu í dag. Ákæran segir að hann hafi ætlað sér að ræna völdum með vopnavaldi. Berezovsky hefur búið í Bretlandi síðan hann flúði Rússland fyrir rúmum sex árum síðan.

Pólverji laminn

Lögregla og sjúkrabíll voru kölluð til að nýbyggingu í Mosfellsbæ um níuleytið í morgun. Grunur leikur á að yfirmaður tveggja pólskra verkamanna hafi gengið í skrokk á þeim eftir að annar þeirra hafði gert athugasemdir við launaseðil sinn.

Rigningarmet slegið í Danmörku

Rigningarmet var slegið í Danmörku í síðasta mánuði. Að meðaltali rignir um 55 millimetra í júní en í ár var magnið 124 millimetrar. Ekki hefur rignt jafn mikið á sama tíma síðan árið 1946.

Lögreglan sektar málglaða ökumenn

Lögreglan á Akranesi stöðvaði alls fimm ökumenn í síðustu viku fyrir að tala í farsíma án þess að nota handfrjálsan búnað. Eiga hinir málglöðu ökumenn von á fimm þúsund króna sekt fyrir athæfið.

Segir hæstaréttarlögmann fara með ósannindi

Fullyrðingar Ragnars H. Hall, hæstaréttarlögmanns, um að embætti ríkislögreglustjóra sé í fjársvelti eru úr lausu lofti gripnar. Þetta kemur fram í grein Helga Magnúsar Gunnarssonar, saksóknara efnahagsbrota, sem birtist í Morgunblaðinu í dag. Helgi segir Ragnar afvegaleiða umræðuna um starfsemi ríkislögreglustjóra.

Geir Ólafsson vísar bréfafölsun á bug

Geir Ólafsson segir í samtali við Vísi.is að það sé rangt að hann hafi falsað bréf frá forsætisráðherra Geir H. Haarde líkt og fram kemur á forsíðu DV í dag. Bréfið átti samkvæmt DV að vera til þess fallið að lokka Nancy Sinatra til landsins. Aðspurður segist Geir kannast við bréfið en að það hafi verið án undirskriftar forsætisráðherrans og því hafi hann ekki sent það.

Fallegasti haninn og fegursta hænan

Árleg sýning landnámshænsnaklúbbsins var haldin laugardaginn 30. júní í Húsdýragarðinum í Laugardal. Þar voru sýnd á sjötta tug fullorðinna hænsna. Einnig var á sýningunni hitakassi með ungum sem voru að skríða úr eggjum. Góð aðsókn var á sýninguna og fengu gestir að velja fallegustu hana og hænu sýningarinnar.

Hamas handtaka talsmann Hers íslam

Hamas samtökin hafa handtekið talsmann hópsins Her íslam sem heldur fréttamanninum Alan Johnston í gíslingu. Hugsanlegt er að Hamas muni notfæra sér það til þess vinna að lausn Johnstons. Samtökin hafa krafist þess að hópurinn láti hann lausann.

Beðnir um að sýna varúð við akstur

Viðgerð á vegaköntum í Langadal í Húnavatnssýslu stendur nú yfir og eru vegfarendur beðnir um að aka varlega þar um. Þetta kemur fram í tilkynningu frá Vegagerðinni.

Maður lést eftir að hafa stokkið niður af 20 metra hárri brú

Tuttugu og tveggja ára gamall maður hoppaði ofan af 20 metra hárri brú í Gautaborg aðfararnótt sunnudags og lést í kjölfarið. Rokktónleikar voru við annan enda Göta - Älv brúarinnar og voru nokkrir sem léku sér að því að stökkva niður af brúnni á meðan á þeim stóð. Maðurinn ætlaði ásamt félaga sínum að hoppa niður en félaginn hætti við á síðustu stundu.

Lögregla sótti Wiltord vegna umferðarbrota

Lögregla sótti í morgun franska framherjann Sylvain Wiltord þar sem hann var að hefja æfingu hjá félagi sínu Olympique Lyon í morgun. Lögreglan vildi yfirheyra leikmanninn í tengslum við umferðarlagabrot. Hann fékk að yfirgefa lögreglustöðina og fara á æfingu eftir að hafa svarað spurningum lögreglu. Honum var svo gert að mæta aftur til lögreglu eftir nokkra mánuði.

Verðmæti framleiðsluvara eykst

Heildarverðmæti seldra framleiðsluvara jókst um tæpan 61 milljarð króna á síðasta ári samkvæmt tölum Hagstofunnar. Hlutdeild matvæla- og drykkjarvöruiðnaðar vegur þyngst.

Leiðtogar Afríku funda í Accra

Leiðtogafundur Afríkusambandsins fer fram í Accra, höfuðborg Ghana, í dag. í sambandinu eru alls 53 ríki. Yfirskrift fundarins eru viðræður um aukna samtvinnun ríkisstjórna Afríku og stærra hlutverk sambandsins. Hugmyndin um Bandaríki Afríku er ekki ný af nálinni en forseti Líbíu, Muammar Gadafi, hvatti leiðtoga Afríkuríkja nýverið til þess að hugsa nánar um hana.

Hús sprakk í Danmörku

Kröftug sprenging jafnaði íbúðarhús í Lystrup við Árósa við jörðu rétt eftir miðnætti í gær. Húsið var tómt og ekki er vitað hvað olli sprengingunni.

Nýr golfvöllur tekinn í notkun

Nýr átján holu golfvöllur var tekinn í notkum að Hamri, skammt frá Borgarnesi í gær. Þetta er stækkun á níu holu velli, sem þar var fyrir. Bæjarstjórn Borgarbyggðar tilkynnti við þetta tækifæri, að bærinn ætlaði að verja 50 milljónum króna, næstu tíu árin, til frekari uppbyggingar á svæðinu. Með tilkomu nýja Hamars vallarins, eru tveir átján holu golfvellir á Vesturlandi, hinn er á Akranesi.

Segja Írana vita af hernaðaraðgerðum í Írak

Háttsettir einstaklingar innan írönsku stjórnarinnar vita af hernaðaraðgerðum Byltingarvarða landsins í Írak. Talsmenn bandaríska hersins fullyrtu þetta í morgun. Bandaríski herinn hefur löngum ásakað Byltingarverðina, sem eru sérsveitir íranska hersins, um að hvetja til og auka á ofbeldi í Írak.