Sýna þjóðinni þá lágmarksvirðingu að hætta að snúa út úr

Formenn stjórnmálaflokka sem eiga sæti á Alþingi mættust í Silfrinu á Rúv nú þegar niðurstöður þjóðaratkvæðagreiðslu um áframhaldandi aðildarviðræður við Evrópusambandið liggja fyrir.

Skoðanakannanir höfðu sýnt að þjóðin væri klofin í afstöðu sinni til spurningarinnar á kjörseðlinum en upp úr kjörkössunum komu tölurnar 46,95 prósent já og 53,05 prósent nei.

Stolt af þjóðinni

Í upphafi þáttar sammæltust gestirnir um að þjóðin hefði verið til fyrirmyndar hvað varðar metkjörsókn en hún var 82,6 prósent í gær sem er mesta þátttaka í þjóðaratkvæðagreiðslu í sögu lýðveldisins.

Þegar leið á þáttinn færðist meiri harka í leikinn og þá sagði Inga Sæland, formaður Flokks fólksins, meðal annars að þjóðaratkvæðagreiðslan hefði verið til þess hugsuð að fá fram samtal, allar umræður um „barbabrellur og popúlismi og allt þetta“ þyrftu að vera slegnar út af borðinu.

Þáttastjórnandi bar því næst upp spurningu sem sneri að EES-samningnum og mögulegu óbreyttu ástandi.

Ekkert nema eftiráskýringar

Guðrún Hafsteinsdóttir formaður Sjálfstæðisflokksins lét spurninguna sem vind um eyrun þjóta og beindi sér að þeim Ingu Sæland, Þorgerði Katrínu utanríkisráðherra og Kristrúnu Frostadóttur forsætisráðherra. Þær sakaði hún um að vera með eftiráskýringar.

„Það er náttúrulega alveg stórkostlegt að heyra núna eftiráskýringar Valkyrjanna varðandi gærdaginn,“ sagði hún.

„Þær tala hér um að þetta sé mikill sigur. Inga Sæland, þið töpuðuð þessum kosningum“

Inga svaraði að vörmu: „Þetta var sigur fyrir þjóðina, það var ekki verið að kjósa um okkur, við skulum átta okkur á því.“

Guðrún hélt svo ótrauð áfram og sagði: „Þegar Þorgerður Katrín talar svo hér um að þetta hafi verið kosning um að sjá samning, það er rangt. Þið voruð að keyra hér kosningabaráttu „Já til að sjá“ en svo segir Kristrún Frostadóttir í þinginu að þjóðin fái ekki að sjá samning...“

Þær Þorgerður og Kristrún voru áberandi vonsviknar yfir þessum ummælum Guðrúnar. Sú síðarnefnda sagði athugasemdir sem þessar algjörlega óþarfar að lokinni atkvæðagreiðslu.

„Við erum ekki á þeim stað að það sé þörf á að snúa lengur út úr, þú veist algjörlega um hvað þetta snerist og hvað ég meinti en mér finnst bara allt í lagi þegar við erum komin á þennan stað að við sýnum þjóðinni þá lágmarksvirðingu að hætta að snúa út úr hvað þetta snerist,“ sagði Kristrún.