Á­kærði hafði af­skipti af vitnis­burði í gegnum fjarfundarbúnað

Sigurður og konan voru í sambúð umrædda helgi í apríl 2024 þegar Sigurði ásamt fimm öðrum er gefið að sök að hafa frelsissvipt og fjárkúgað maltneskan mann. Rúv greinir frá því að þau hafi skilið síðan þá og sé hún fyrrverandi eiginkona hans.

Hún hygðist gefa skýrslu í gegnum fjarfundarbúnað en í fyrstu spurningunni heyrðist í karlmannsrödd í bakgrunninum. Sækjandi og dómari mátu svo að þar væri Sigurður Gunnar að hafa afskipti af vitnisburðinum.

„Ég veit að maðurinn minn er saklaus,“ var eina setningin sem hún náði að segja.

Vegna þessa gerði dómarinn henni að mæta sjálf fyrir dómara svo enginn gæti haft áhrif á vitnisburðinn hennar.

„Þetta gengur ekki, þú verður að koma sjálf og koma fyrir dómara,“ sagði dómarinn við vitnið.

„Sækjandi heyrði í eiginmanni þínum í bakgrunni.“

Konan reyndi að þvertaka fyrir það og sagði að Sigurður hefði einungis verið á leiðinni á baðherbergið og væri í stofunni. Hún væri því ein.

„Þetta er ekki til umræðu, þú verður að koma sjálf,“ svaraði dómarinn.

Við þetta andvarpaði konan en samþykkti að mæta síðar í dag og gefa vitnisburðinn sinn í dómssal.

Var veik og muni ekkert

Þegar konan, sem vísar í Sigurð sem eiginmann sinn, mætir loks fyrir dóm kemur Sigurður með í för. Dómari gerir skýrt fyrir henni að hún þurfi ekki að segja neitt sem varðar eiginmann hennar, stjúpdóttur og tengdason.

„Ég vil bara segja að ég veit að maðurinn minn er saklaus. En ég ætla að nýta rétt minn því ég vil ekki segja neitt vegna sambands við eiginmann minn Sigurður Gunnar Ásgeirsson og stjúpdóttur Ingunnar Rutar Sigurðardóttir,“ segir konan.

Henni er samt sem áður gert að svara spurningum um meintan þátt hinna þriggja.

„Ég var veik og ég var uppi í rúmi,“ segir hún aðspurð.

Textaskilaboð sem eiginkonan sendi á son sinn annars vegar og móður hins vegar eru borin undir hana.

Þar spyr sonurinn um nýjustu fréttir af „arabanum“ en konan segist ekki muna eftir þeim. Hún kannast þá ekki við að hafa rætt brotaþola við son sinn og eigi erfitt með að muna eftir að hafa dvalið á geðsjúkrahúsi.

Aðspurð um samskipti milli hennar og brotaþola. Ítrekar hún að hún muni ekkert.

Fréttin hefur verið uppfærð eftir vitnisburðinn.