42 ára aldurs­munur á kepp­endum í 1500 metra hlaupi kvenna

Hundraðasta Meistaramót Íslands í frjálsíþróttum fer fram á ÍR-vellinum í Skógarseli um helgina. Mótið verður sett með viðhöfn í dag en heldur svo áfram á laugardag og sunnudag.

Mótið markar stór tímamót í íslenskri frjálsíþróttasögu og verður haldið með veglegri umgjörð.

Keppni hefst klukkan 17:30 í dag með stangarstökki kvenna og spjótkasti karla. Að lokinni keppni í kvöld verður haldin móttaka í ÍR-heimilinu þar sem saga Meistaramótsins verður rifjuð upp og sérstök sýning um þróun mótsins kynnt.

Meðal greina í kvöld er 1500 metra hlaup kvenna en þar eru á keppendalistanum þær Fríða Rún Þórðardóttir og Elenóra Ósk Bjarnadóttir sem þýðir að það er 42 ára aldursmunur á keppendum í þessu hlaupi.

Fríða Rún er fædd árið 1970 og því 56 ára gömul. Elenóra Ósk er fædd árið 2012 og verður ekki fjórtán ára fyrr en í næsta mánuði.

Meðal keppenda eru einnig reynsluboltarnir Aníta Hinriksdóttir og Íris Anna Skúladóttir en Aníta á besta tímann á árinu af öllum sem eru skráðar á ráslista hlaupsins.