Kosningavökur flokkanna: Hótel, veislusalir og einn leynistaður

Flokkarnir halda kosningavökur um allt land en stærstu teitin verða þó í höfuðborginni þar sem spennan er einna mest. Flokkarnir fara ólíkar leiðir í vali á stöðum fyrir kosningavökurna, veislusalir hótela eru vinsælir sem og samkomusalir og svo nýta aðrir eigin húsnæði.

Hér fyrir neðan ber að líta lista yfir kosningavökur flokkanna í Reykjavík á laugardagskvöld. Stjórnmálaflokkurinn Okkar borg - þvert á flokka sker sig úr hópnum og gefur ekki upp nákvæma staðsetningu.

Flokkur fólksins - Fjörgyn í Grafarvogskirkju

Flokkur fólksins hefur gegnum tíðina haldið kosningavöku sína í höfuðstöðvum sínum í salnum Fjörgyn á neðri hæð Grafarvogskirkju. Það er ekki breyting þar á í ár.

Framsóknarflokkurinn - Ský bar

Framsóknarflokkurinn í Reykjavík heldur kosningavöku sína á barnum Ský sem er á áttunda hæð Center Hotels Arnarhvoll við Ingólfsstræti 1. 

Góðan daginn - Hótel Eyja

Yngsta framboðið, Góðan daginn, heldur kosningavöku sína í veislusal Hótels Eyju á Brautarholti 10. Frumlegt og spennandi val.

Miðflokkur - Hótel Borg

Miðflokkurinn heldur sameiginlega kosningavöku fyrir allt höfuðborgarsvæðið á Hótel Borg. Það verður því væntanlega margt um manninn.

Okkar borg - Leynilegur staður

Samkvæmt svörum frá framboðinu Okkar borg - þvert á flokka til fréttastofu verður kosningavaka þess „á leynistað“. Þeir sem hafa í hyggju að heimsækja allar kosningavökurnar þetta kvöldið verða því annað hvort að þefa leynistaðinn uppi eða hringja í framboðið.

Píratar - Tunglið

Píratar halda kosningavöku sína í veislusalnum Tunglinu á Lækjargötu frá klukkan 20 til 1 um nóttina. „Gott aðgengi og drykkir í boði á meðan birgðir endast,“ segir í lýsingu Pírata á viðburðinum.

Samfylking - Austurbæjarbíó

Samfylkingin verður með kosningavöku sína í Austurbæjarbíói á Snorrabraut. Samfylkingin í Reykjavík hélt kosningavökuna árið 2018 líka í Austurbæjarbíói og náði þá rúmum 25 prósentum - flokkurinn vonast eftir svipuðum niðurstöðum í ár.

Sjálfstæðisflokkur - Sjálfstæðissalurinn

Sjálfstæðismenn verða á hárréttum stað ef miðað er við nafnið, í Sjálfsstæðissalnum á Parliament Hotel við Austurvöll. Þeir voru líka þar í síðustu Alþingiskosningum og virðast una sér vel þar.

Sósíalistar - Félagsheimili Sósíalistaflokksins

Sósíalistar fara svipaða leið og Flokkur fólksins og halda kosningavöku sína i félagsheimili flokksins á Hverfisgötu 105. Þetta þarf ekki alltaf að vera flókið, partý í heimahúsi eru oft bestu partýin.

Viðreisn- Kolaportið

Viðreisn heldur kosningavöku sína í Kolaportinu á Tryggvagötu frá klukkan 20 til miðnættis. Samfylkingin hélt kosningavöku sína þar í síðustu Alþingiskosningunum og uppskar ríkulega, spurning hvað Björg og félagar fá upp úr kössunum.

Vinstrið - Tónabíó

Kosningavaka Vinstrisins verður í Tónabíói í Skipholti þar sem er nýlega búið að endurvekja gamla tónleikasalinn til ýmiss konar viðburðahalds.